1in.am

Արման Բաբաջանյանը 1in.am առցանց լրատվամիջոցի հիմնադիրն ու սեփականատերն է։ Մինչ այդ նա հոգեւորական է եղել, հետագայում սկսել է զբաղվել քաղաքականությամբ: Արման Բաբաջանյանը 1989-ին եղել է Արարատյան հայրապետական թեմի Հայ եկեղեցու երիտասարդաց միության ատենապետը։ 1990-1993թթ. եղել է նույն միության «Հայորդի» պարբերականի խմբագիրը: 1993-1995թթ. սովորել է Վենետիկի Սուրբ Ղազար կղզու հոգևոր ակադեմիայում: 1995-ին ավարտել է Վենետիկի Մուրադ Ռաֆայելյան վարժարանը: 1998թ.՝ Վազգենյան հոգեւոր դպրանոցը և Էջմիածնի Գեւորգյան ճեմարանը։ 1998-ի նախագահական ընտրություններում Բաբաջանյանը եղել է նախագահի թեկնածու Կարեն Դեմիրճյանին սատարող երիտասարդական կազմակերպությունների  համակարգող: 2001-ին ավարտել է Ռուսաստանի Սանկտ Պետերբուրգի արտաքին տնտեսական կապերի, էկոնոմիկայի եւ իրավունքի ինստիտուտը: 2003-ի նախագահական ընտրություններում նախագահի թեկնածու Ստեփան Դեմիրճյանի նախընտրական շտաբի պատասխանատուն էր Լոս Անջելեսում: 2003-ին եղել է նաև Լոս Անջելեսում հրատարակվող «Ժամանակ» օրաթերթի հիմնադիրն ու խմբագիրը։ 2004-ին Բաբաջանյանն ավարտել է ԱՄՆ-ի Հարավային Կալիֆոռնիայի համալսարանի արտաքին հարաբերությունների ֆակուլտետը: Հաջորդ տարում՝ 2005-ին, Արման Բաբաջանյանն ավարտել է ԱՄՆ-ի Ջորջթաունի համալսարանի Security Studies (SSP) դպրոցը:  2006-ին նա եղել է  «Ժամանակ Երևան», ապա՝ «Ժամանակ» օրաթերթերի հիմնադիր խմբագիրը: 2006-ին Բաբաջանյանը դատապարտվել է 4 տարվա ազատազրկման՝ զինվորական ծառայությունից խուսափելու համար։ 2010-2019թթ. «1in.am. Առաջին լրատվական» կայքէջի հիմնադիր խմբագիրն էր: 2018թ. դեկտեմբերի 9-ին ԱԺ պատգամավոր է ընտրվել «Լուսավոր Հայաստան» կուսակցության համապետական ընտրական ցուցակով: 2019-ի սեպտեմբերի 6-ին Արման Բաբաջանյանը հայտարարեց, որ դուրս է գալիս «Լուսավոր Հայաստան» խմբակցությունից։ Հետագայում նա իր գործունեությունը շարունակեց որպես անկախ պատգամավոր։ 2020-ին Բաբաջանյանը հիմնադրել է «Հանուն Հանրապետության» կուսակցությունը։ Իսկ 2021-ին տեղի ունեցած արտահերթ խորհրդարանական ընտրություններին մասնակցել է «Քրիստոնեա-ժողովրդավարական» կուսակցության առաջնորդ Լևոն Շիրինյանի հետ «Շիրինյան-Բաբաջանյան ժողովրդավարների դաշինքով»։ 2024-ի օգոստոսին Արման Բաբաջանյանը և մի խումբ այլ արևմտամետ ուժեր ստորագրահավաք սկսեցին Եվրոպական Միությանը անդամակցելու հարցով հանրաքվե անցկացնելու պահանջով։ Բաբաջանյանն իր ելույթներում հաճախ քննադատում է Ռուսաստանի վարած քաղաքականությունը, բողոքի ակցիաներ կազմակերպում։ 2025-ի օգոստոսի 23-ին Գյումրիում բողոքի ակցիա էր իրականացրել՝ ընդդեմ այնտեղ գործող ռուսական 102-րդ ռազմաբազայի։ Ակցիայի ժամանակ Բաբաջանյանը հայտարարել էր, որ Հայաստանում միայն հայ զինվորներ պետք է լինեն, իսկ ռազմաբազան պետք է դուրս բերվի։

Տնօրենը 2019-ից Հասմիկ Մարտիրոսյանն է։ 2018-ի հրապարակումներում Մարտիրոսյանը նշվում է որպես 1in.am-ի մարքեթինգի բաժնի պատասխանատու։ Ընկերության կանոնադրության համաձայն՝ տնօրենը հիմնականում իրականացնում է ընթացիկ գործունեության ղեկավարումը։ Նա իրավունք ունի առանց լիազորության գործարքներ կատարել ընկերության անունից, եթե գործարքի գումարը չի գերազանցում ընկերության զուտ ակտիվների մեծության 25%-ը։

Սիրանուշ Պապյանը 1in.am առցանց լրատվամիջոցի խմբագիրն է։ 1in.am-ին սկսել է թղթակցել 2011-ից։ 2009-ից թղթակցել է նաև lragir.am առցանց պարբերականին և «Ժամանակ» թերթին։  2016-ին Պապյանը հայց էր ներկայացրել դատարան՝ ընդդեմ այդ ժամանակ ոստիկանապետ Վլադիմիր Գասպարյանի։ Լրագրողը դատարանից պահանջել էր պարտավորեցնել Վլադիմիր Գասպարյանին հրապարակային ներողություն խնդրել իր պատիվն ու արժանապատվությունը վիրավորելու համար։ Միջադեպը տեղի էր ունեցել ապրիլի 24-ին՝ Հայոց ցեղասպանության զոհերի հուշահամալիրում։ Հակադարձելով լրագրող Սիրանուշ Պապյանի դիտարկմանը, թե ոստիկանությունը պարբերաբար խոսում է բարեփոխումների մասին, սակայն հասարակությունը դրանք չի տեսնում, նախկին ոստիկանապետն ասել էր, թե ինքն էլ նրա մեջ կին չի տեսնում։ Ոստիկանապետի պահվածքի համար իշխանության անունից ներողություն էր խնդրել ԱԺ փոխնախագահ Էդուարդ Շարմազանովը։ Այդուհանդերձ, ոստիկնությունը հայտարարություն էր տարածել՝ նշելով, թե ոստիկանապետը լրագրողին չի վիրավորել, միտքը սխալ է ընկալվել։ Լրատվամիջոցների հետ զրույցում լրագրողն ասել էր, թե մեծ ակնկալիքներ չունի դատական համակարգից, բայց դատական գործընթացը կարող է դառնալ նախադեպ՝ զսպելու պաշտոնյաներին հետագայում  լրագրողներին վիրավորելուց։ Ի վերջո, դատարանը մերժել էր նրա հայցը՝ այն համարելով անհիմն։