«24 Նյուզ» ՍՊԸ-ն գրանցվել է 2018-ին։ Տնտեսական գործունեության տեսակը՝ նորությունների գործակալություն։ 

«24 Նյուզ» ՍՊԸ-ի հիմնադիրներն են Նարեկ Գալստյանն ու ֆրանսաբնակ Գէորգ Սաչլեանը։ Հիմնադրման պահին Նարեկ Գալստյանն ունեցել է 60% բաժնեմաս, Գէորգ Սաչլեանը՝ 40%: 2025-ի հունվարին, սակայն,Գալստյանն իր բաժնեմասի մի մասը փոխանցել է լեհաստանաբնակ Քժիշտոֆ Սմիկին։ Ներկայում Գալստյանն ընկերությունում 10% բաժնեմաս ունի, Քժիշտոֆ Սմիկին պատկանում է 50%-ը, Գէորգ Սաչլեանին՝ 40%-ը։

Սեփականության այս փոփոխությունները հարցեր են առաջացնում խմբագրական վերահսկողության և որոշումների կայացման վերաբերյալ․ համահիմնադիր Նարեկ Գալստյանը, որը շարունակում է զբաղեցնել խմբագրի և տնօրենի պաշտոնը, այժմ ընկերությունում փոքր բաժնեմաս ունի։ Մինչդեռ ընկերության 90%-ը վերահսկում են արտասահմանում բնակվող երկու բաժնետերերը։ Նարեկ Գալստյանը նաև լրատվամիջոցի հանրային դեմքն է, քանի որ հաղորդումներ է վարում, ինչպես, օրինակ՝ «Պրոֆզրույց» ծրագիրը թուրքագետ Ռուբեն Մելքոնյանի հետ համատեղ։

Ընկերության քաղաքական կապերը խորն են՝ Գալստյանը ընդդիմադիր քաղաքական գործունեություն է ունեցել՝ ներառյալ Սոցիալ-դեմոկրատ հնչակյան կուսակցության ղեկավարումը և հայաստանի իշխանությունների հետ ունեցած նախկին առճակատումները։  Այս քաղաքական պատկանելությունը կարող է ազդել լրատվամիջոցի խմբագրական դիրքորոշման վրա, չնայած մեծամասնություն կազմող օտարերկրյա բաժնետերերի ազդեցության չափը մնում է անորոշ՝ հաշվի առնելով նրանց ծագման և շահերի վերաբերյալ սահմանափակ հանրային տեղեկատվությունը։