Համահիմնադիրներին հնարավոր չէր նույնականացնել, նրանց անուններից բացի կենսագրական որևէ տեղեկություն հանրային աղբյուրներում հասանելի չէ։ Քանի որ գտնվել են միայն նրանց անուններն ու ազգանունները, անհնար է պարզել նրանց ինքնությունը կամ տրամադրել հավելյալ մանրամասներ։

Հեռուստաընկերության համահիմնադիրներին հնարավոր չի եղել նույնականացնել, քանի որ միայն նրանց անունը և ազգանունն է հայտնի, այդ իսկ պատճառով հնարավոր չի եղել պարզել նրանց ինքնությունը և ներկայացնել լրացուցիչ մանրամասներ։

Սեդրակ Առուստամյանը «Մուլտի մեդիա-կենտրոն թիվի» ՓԲ ընկերության տնօրենների խորհրդի անդամ է։ Սեդրակ Առուստամյանի անունը հաճախ կապվում է քաղաքական գործիչ և գործարար Գագիկ Ծառուկյանի հետ։ Նա ներգրավված է Ծառուկյանի բիզնեսներում՝ որպես փայատեր կամ տնօրեն։ Բացի այդ, Առուստամյանը եղել է նաև Ծառուկյանի վստահված կառավարիչը, երբ վերջինս պատգամավոր էր և իրավունք չուներ զբաղվել բիզնեսով։ Նրա դուստրը՝ Նորա Առուստամյանը, եղել է Ազգային ժողովի պատգամավոր «Բարգավաճ Հայաստան» կուսակցությունից, իսկ մինչ այդ՝ Ծառուկյանի օգնականը։

Առուստամյանը մի քանի անգամ հայտնվել է իրավապահների ուշադրության կենտրոնում։ Նա որպես ամբաստանյալ ներգրավված է Հակակոռուպցիոն քրեական դատարանում քննվող երկու գործով, որոնցից մեկում մեղադրյալ է նաև Գագիկ Ծառուկյանը։ Այս գործով նրանց մեղադրում են ընտրությունների ժամանակ ընտրողներին կաշառք տալու մեջ՝ «Բարգավաճ Հայաստանի» օգտին ձայներ ապահովելու նպատակով։ Գործի վերաբերյալ վերջնական որոշում դեռ չկա։

Բացի այդ, Առուստամյանը երկու քաղաքացիական գործով պատասխանող է Հակակոռուպցիոն դատարանում։ Դատախազությունը պահանջում է բռնագանձել նրա ունեցվածքը՝ գումարներ, անշարժ գույք և մեքենաներ։ Այս գործերից մեկում պատասխանող է նաև Գագիկ Ծառուկյանը։

Այս ամենը վկայում է, որ Սեդրակ Առուստամյանն ու Գագիկ Ծառուկյանը սերտ բիզնես կապեր ունեն։ Հետևաբար, հասարակության շրջանում տարածված կարծիքը, թե «Կենտրոն» հեռուստաալիքի իրական շահառուն Ծառուկյանների ընտանիքն է, հիմնավորված է թվում։

Արայիկ Կեսոյանը «Մուլտի մեդիա-կենտրոն թիվի» ՓԲ ընկերության տնօրենների խորհրդի անդամ է։ Նա Գագիկ Ծառուկյանի գործընկերներից է։ Արայիկ Կեսոյանը «Մուլտի գրուպ» կոնցեռն ՍՊԸ-ի տնօրենն է։ Այս պաշտոնում նշանակվել է 2020 թվականին, երբ Սեդրակ Առուստամյանն ազատվել է տնօրենի պաշտոնից։ «Մուլտի գրուպ» կոնցեռն ՍՊԸ-ն Ծառուկյանի կարևոր բիզնես նախագծերից մեկն է։ Բացի «Մուլտի գրուպ» կոնցեռն ՍՊԸ-ից՝ Արայիկ Կեսոյանը ներգրավված է մի քանի այլ ընկերություններում, որոնք պատկանում են Ծառուկյան ընտանիքին։

Դավիթ Մանթաշյանը «Մուլտի մեդիա-կենտրոն թիվի» ՓԲ ընկերության տնօրենների խորհրդի անդամ է։ Նա մասնագիտությամբ իրավաբան է, մեկ դատական գործով դատարանում ներկայացրել է նաև «Մուլտի մեդիա-կենտրոն թիվի» ՓԲ ընկերության շահերը։ Դավիթ Մանթաշյանը «Գագիկ Ծառուկյան» բարեգործական հիմնադրամի իրական շահառուներից է։ Հիմնադրամի իրական շահառուների հայտարարագրում, բացի Մանթաշյանից, ներկայացված են նաև Գագիկ Ծառուկյանը, նրա մայրը՝ Ռոզա Ծառուկյանը, կինը՝ Ջավահիր Ծառուկյանը և Սեդրակ Առուստամյանը։

Գագիկ Ծառուկյանը հայտնի գործարար և քաղաքական գործիչ է, «Բարգավաճ Հայաստան» կուսակցության հիմնադիր նախագահը։ Նա երկար տարիներ եղել է Ազգային ժողովի պատգամավոր և համարվում է Հայաստանի ամենահարուստ մարդկանցից մեկը։

«Հետք» առցնանց լրատվամիջոցի հրապարակումները մանրամասնում են Ծառուկյանի բազմաճյուղ բիզնես կայսրությունը, որը սկսվել է Աբովյանի շրջանից և տարածվել Հայաստանով մեկ, ինչպես նաև դրանից դուրս՝ նախկին խորհրդային և եվրոպական երկրներում։ Նրա բիզնեսների մեջ են մտնում «Մուլտի Գրուպ» կոնցեռնը, «Առինջ Մոլ» առևտրի կենտրոնը, «Արարատ» կոնյակի, գինու, օղու կոմբինատը և այլ ձեռնարկություններ։  2021 թվականին Հայաստանի իշխանությունները Գագիկ Ծառուկյանից պահանջել են բռնագանձել ապօրինի ծագում ունեցող գույք՝ 79 անշարժ գույք, 42 տրանսպորտային միջոց, 86 մլրդ դրամ, ինչպես նաև բաժնետոմսեր 39 ընկերություններում։

Կենտրոն հեռուստաալիքը Գագիկ Ծառուկյանի անվան հետ սկսեց կապվել 2004 թվականին, երբ այն գնեց Ծառուկյանի համագյուղացի, խնամի, ԱԺ պատգամավոր, ՀՀԿ խմբակցության անդամ Մուրադ Գուլոյանը, որը հետագայում դարձավ Գագիկ Ծառուկյանի ղեկավարած «Բարգավաճ Հայաստան կուսակցության» անդամ։ «Հետք» թերթի 2005 թվականի հոդվածում նշվում է. ««Կենտրոնի» պատասխանատուներից մեկը մեզ խոստովանեց, որ հաշվետու է միայն Գագիկ Ծառուկյանին: «Մուրադ Գուլոյան չկա»,-կենդանի, ապրող մարդու մասին բառացիորեն ասաց նա»:

2025-ի տվյալներով, «Կենտրոն» հեռուստաալիքը տնօրինող «Մուլտի մեդիա-կենտրոն թիվի» ՓԲԸ-ի 100% բաժնետերը Սեդրակ Առուստամյանն է, որը Գագիկ Ծառուկյանի հետ բիզնես կապեր ունի։ Նա 1998-ից մինչև 2020-ի հունիսը եղել է «Մուլտի գրուպ» կոնցեռն ՍՊԸ-ի տնօրենը, իսկ ընկերության սեփականատերերն են Գագիկ Ծառուկյանը և նրա որդին։ Այս ընկերությունը Ծառուկյան ընտանիքի կարևոր ընկերություններից մեկն է։ Այս պահին Առուստամյանը մի շարք ընկերություններում, որոնք կապ ունեն Ծառուկյանների հետ, կամ փայատեր է, կամ տնօրեն։