Արմենիկա Կիվիրյանը «Նյուզ էյէմ» ՍՊԸ-ի հիմնադիրն ու միակ սեփականատերն է։ Նա ընկերությունը հիմնադրել է 2011 թվականի հունվարի 25-ին՝ Աշոտ Մանուկյանի և «Ջիէմէլսի» ՍՊԸ-ի հետ միասին։ Չնայած համահիմնադիրները կարճ ժամանակ անց իրենց մասնաբաժինը ըներությունում փոխանցել են այլ անձանց, Կիվիրյանը շարունակել է իր գործունեությունը և 2018 թվականի հոկտեմբերի 9-ից դարձել է ընկերության միակ մասնակիցը։

Արմենիկա Կիվիրյանը 1992-1997թթ․-ին սովորել է Հրաչյա Աճառյանի անվան համալսարանի միջազգային ժուռնալիստիկայի ֆակուլտետում։ 2000-ականներին աշխատել է «Արմինֆո» լրատվական գործակալությունում։ «Հայաստանի ժուռնալիստների միության» կայքում նշված է, որ Արմենիկա Կիվիրյանը հրապարակումներ է ունեցել նաև «Ռուսկայա միսլ» (Русская мысль) ամսագրում։

Աշոտ Մանուկյանը 2011 թվականին Արմենիկա Կիվիրյանի և «Ջիէմէլսի» ՍՊԸ-ի հետ համատեղ հիմնադրել է «Նյուզ էյէմ» ՍՊԸ-ն, սակայն կարճ ժամանակ անց ընկերությունում իր մասնակցությունը փոխանցել է այլ անձի։ 

Աշոտ Մանուկյանը նախկինում քաղաքականությամբ է զբաղվել, պետական տարբեր պաշտոններ է զբաղեցրել, մինչև 2018 թվականի իշխանափոխությունը նա զբաղեցրել է էներգետիկայի և բնական պաշարների նախարարի պաշտոնը, ավելի վաղ զբաղեցրել է վարչապետի աշխատակազմի, ֆինանսների և էկոնոմիկայի նախարարության աշխատակազմի ղեկավարի պաշտոնները։ Աշոտ Մանուկյանը 1990-ականներին աշխատել է «Ռեսպուբլիկա Արմենիա» օրաթերթում՝ որպես թղթակից։

Նա ներգրավված է եղել տարբեր բիզնեսներում որպես տնօրեն կամ փայատեր։ Այս ընկերությունները, հիմնականում, գործել են էներգետիկայի ոլորտում, այժմ դրանք պատկանում են ռուսաստանահայ միլիարդատեր Սամվել Կարապետյանին և նրա ընտանիքին։ Աշոտ Մանուկյանի հետ բնակվող անձանցից մեկը 5% մասնաբաժին ունի «Ինվեսթմընթ մեդիա գրուպ (այ-էմ-ջի) ՍՊ ընկերությունում, որը հիմնադրել է Աշոտ Մանուկյանը, բայց այժմ մեծամասամբ պատկանում է Սամվել Կարապետյանին և նրա ընտանիքին։ Այդ ընկերությունը, ըստ ՊԵԿ-ի տվյալների, էլեկտրաէներգիայի արտադրությամբ է զբաղվում։

«Ջիէմէլսի» ընկերությունը Հայաստանում գրանցված չէ և ամենայնհավանականությամբ օտարերկրյա կազմակերպություն է։ ՀՀ իրավաբանական անձանց ռեգիստրում այն հիշատակվում է միայն երկու անգամ՝ որպես «Նյուզ էյէմ» ՍՊԸ-ի համահիմնադիր և մասնակից «Մեդիա սթայլ» ՍՊԸ-ում։ «Մեդիա սթայլ»-ում ընկերությունը փայատեր է դարձել 2009 թվականին, սակայն մոտ մեկուկես տարի անց իր մասնաբաժինը փոխանցել է այլ ֆիզիկական անձի։ 

Այս երկու ընկերություններում «Ջիէմէլսի»-ի հասցեները տարբեր են։ Առաջին դեպքում նշված հասցեն («Մեդոու հաուզ 116Ա. ԲԼԵՔ. Հ.») հնարավոր չէր նույնականացնել, թե որ երկրում է այն, իսկ երկրորդ ընկերությունում հասցեն նշված է՝ Վիրջինյան կղզիներ, Թորթոլլա Ռոադ։

Արտասահմանյան ռեգիստրներում այս ընկերության վերաբերյալ տեղեկատվություն գտնել չհաջողվեց։ Ստացվում է՝ մեզ չհջողվեց պարզել, թե ով կամ ովքեր են կանգնած «Նյուզ էյէմ» ՍՊԸ-ի համահիմնադիր ընկերության թիկունքում։