Միհրան Հակոբյանը (ծնվ. 1984թ. հուլիսի 15) «Քառյակ Մեդիա» ՓԲԸ-ի համահիմնադիրն 50% սեփականատերն է։ Նա պատմական գիտությունների թեկնածու է և մասնագիտացած է միջազգային հարաբերությունների ոլորտում։

Հակոբյանը մեդիա ոլորտում իր գործունեությունը սկսել է 2003-2005 թվականներին՝ որպես «Երկիր» և «168 Ժամ» պարբերականների թղթակից։ Այնուհետև նա անցում է կատարել հեռուստատեսային արտադրության՝ 2014-2015 թվականներին աշխատելով «Արմենիա TV»-ում որպես «Ժամ» լրատվական ծրագրի պրոդյուսեր, իսկ 2015-2017 թվականներին ղեկավարել է «Արարատ» հեռուստաընկերության լրատվական և քաղաքական ծրագրերը։

Նա իր քաղաքական ուղին սկսել է 2011 թվականին՝ անդամակցելով Հայաստանի Հանրապետական կուսակցության (ՀՀԿ) խորհրդին, իսկ 2011-2014 թվականներին զբաղեցրել է վարչապետ Տիգրան Սարգսյանի օգնականի պաշտոնը։ 2017 թվականին Հակոբյանն ընտրվել է Ազգային ժողովի պատգամավոր՝ ՀՀԿ համապետական ընտրական ցուցակով։

2019 թվականի հունվարին նա հեռացել է ՀՀԿ-ից և Սամվել Ֆարմանյանի, Արման Սաղաթելյանի և Կարեն Բեքարյանի հետ համահիմնադրել «Քառյակ Մեդիա» ՓԲԸ-ն։ 2025 թվականին նա դարձել է ընկերության 50% սեփականատերը՝ ձեռք բերելով Կարեն Բեքարյանի 25% բաժնեմասը, ինչի արդյունքում տնօրինում է ընդհանուր բաժնեմասերի կեսը։

2018 թվականի իշխանափոխությունից հետո Միհրան Հակոբյանը՝ որպես ընդդիմադիր գործիչ, հայտնվել է քրեական հետապնդումների թիրախում։ Նրան մեղադրանք է առաջադրվել բռնությունը հրապարակայնորեն արդարացնելու (2020թ. դեկտեմբեր) և 2020 թվականի նոյեմբերին հավաքների ժամանակ ռազմական դրության սահմանափակումները խախտելու համար։ Երկու գործերն էլ կարճվել են՝ հանցակազմի բացակայության հիմքով։

Արման Սաղաթելյանը (ծնվ. 1975թ. օգոստոսի 26) «Քառյակ Մեդիա» ՓԲԸ-ի համահիմնադիրներից է։ Նա քաղաքական գիտությունների թեկնածու է և լայն կապեր ունի Հայաստանի քաղաքական ու մեդիա ոլորտներում։

Սաղաթելյանը մեդիա ոլորտում իր գործունեությունը սկսել է դեռևս 1991 թվականին՝ Հայաստանի ազգային հեռուստատեսությունում, ապա զբաղեցրել մի շարք բարձր պաշտոններ, այդ թվում՝ «ԱրմՌադիո ՖՄ 107»-ի տնօրեն (2011-2013 թթ․), «ՊանԱրմենիան Մեդիա Գրուպի» գլխավոր տնօրենի տեղակալ (2012-2013 թթ․)։

Նա զգալի դերակատարում է ունեցել նաև պետական ապարատում՝ 2013-2015 թվականներին աշխատելով որպես ՀՀ նախագահ Սերժ Սարգսյանի մամուլի քարտուղար։ 2015-2016 թվականներին եղել է ՀՀ հանրային ռադիոյի տնօրեն։ Հատկանշական է, որ 2010-2011 թվականներին, երբ Սաղաթելյանը խորհրդական էր նախագահի աշխատակազմում, նրա հորեղբայրը՝ Արա Սաղաթելյանը, նույն «Հանրային կապերի և տեղեկատվության կենտրոնի» տնօրենն էր։

2017 թվականին Սաղաթելյանն ընտրվել է Ազգային ժողովի պատգամավոր՝ ընդգրկվելով Հայաստանի Հանրապետական կուսակցության (ՀՀԿ) ընտրական ցուցակում՝ որպես անկուսակցական թեկնածու։ 2019 թվականի հունվարին նա Միհրան Հակոբյանի, Սամվել Ֆարմանյանի և Կարեն Բեքարյանի հետ համահիմնադրել է «Քառյակ Մեդիա» ՓԲԸ-ն։

Սամվել Ֆարմանյանը (ծնվ. 1978թ. փետրվարի 17) «Քառյակ Մեդիա» ՓԲԸ-ի համահիմնադիրներից է՝ Միհրան Հակոբյանի հետ միասին։ Նա պատմական գիտությունների թեկնածու է և զգալի փորձ ունի ինչպես քաղաքացիական հասարակության, այնպես էլ պետական կառավարման համակարգերում։

Մինչև պետական ծառայության անցնելը՝ 2003-2005 թվականներին Ֆարմանյանը համակարգել է «Բաց հասարակության ինստիտուտի» հայաստանյան մասնաճյուղի Քաղաքացիական հասարակության և Զանգվածային լրատվության ծրագրերը։ 2005-2006 թվականներին նա աշխատել է որպես Ազգային ժողովի նախագահի խորհրդական՝ զբաղվելով արտաքին քաղաքականության հարցերով, իսկ 2008 թվականին միացել է նախագահ Սերժ Սարգսյանի աշխատակազմին՝ որպես ռեֆերենտ և մամուլի քարտուղար։ Հետագայում՝ 2010-2012 թվականներին, նա ղեկավարել է Հանրային հեռուստատեսության և Հանրային ռադիոյի լրատվական ու վերլուծական ծրագրերը։

Ֆարմանյանը 2012 թվականին անդամագրվել է Հայաստանի Հանրապետական կուսակցությանը (ՀՀԿ), իսկ 2016 թվականին ընտրվել է դրա գործադիր մարմնի կազմում։ Նա երկու անգամ անընդմեջ Ազգային ժողովի պատգամավոր է եղել (2012-2017 և 2017-2018 թթ․), աշխատել է Արտաքին հարաբերությունների մշտական հանձնաժողովում և ղեկավարել Հայաստան-ԵՄ Խորհրդարանական համագործակցության հանձնաժողովում հայկական պատվիրակությունը, եղել ԵԽԽՎ հայաստանյան պատվիրակության անդամ:

2018 թվականի իշխանափոխությունից հետո ընդդիմադիր դիրքերից քննադատում է Նիկոլ Փաշինյանի քաղաքականությունը։

2019 թվականի հունվարին նա դուրս է եկել ՀՀԿ-ից և Միհրան Հակոբյանի, Արման Սաղաթելյանի և Կարեն Բեքարյանի հետ համահիմնադրել «Քառյակ Մեդիա» ՓԲԸ-ն։

Բացի քաղաքականությունից և մեդիայից, նա դասավանդել է Երևանի պետական համալսարանում և Հայաստանի ամերիկյան համալսարանում (ՀԱՀ)։ 2025 թվականի օգոստոսին նա դադարեցրել է իր համագործակցությունը ՀԱՀ-ի հետ՝ իր գնահատմամբ՝ քաղաքական ճնշումների պատճառով։

Կարեն Բեքարյանը «Քառյակ Մեդիա» ՓԲԸ-ի համահիմնադիրներից է։ 

Ծնվել է 1970թ. մարտի 2-ին Երեւանում: Մաթեմատիկոս է, ֆիզիկամաթեմատիկական գիտությունների թեկնածու։

1993-1999 թվականներին աշխատել է ՀՀ ներքին գործերի նախարարության անձնագրերի և վիզաների վարչությունում՝ որպես տեսուչ, ապա՝ ավագ տեսուչ։ Դրանից հետո` 1999-2010 թվականներին,  ՀՀ ԱԺ արտաքին հարաբերությունների մշտական հանձնաժողովի փորձագետ է եղել։ Միաժամանակ, 2001-2002 թվականներին Բեքարյանն ընդգրկվել է ՀՀ կառավարությանն առընթեր միգրացիայի և փախստականների հարցերով փորձագետների հանձնաժողովում։ 

2003 թվականից ակտիվ գործունեություն է սկսել մեդիա ոլորտում։ Եղել է «Երկրագունդ» եւ «Եվրոպական օրագիր» միջազգային վերլուծական («Երկիր մեդիա» ՀԸ), «Հայացք աշխարհին» միջազգային վերլուծական («Երեւան» ՀԸ) եւ «Realpolitik» («Իրական քաղաքականություն») վերլուծական (Հանրային ՀԸ) հեռուստածրագրերի հեղինակ եւ վարող։ 

Մեդիա ոլորտում նաև ղեկավար պաշտոններ է ստանձնել։ 2006-2010 թվականներին եղել է «Արմեդիա» տեղեկատվական, վերլուծական գործակալության տնօրեն, իսկ 2010-2011 թվականներին նա աշխատել է ՀՀ հանրային ռադիոյում որպես լրատվական, քաղաքական և վերլուծական ծրագրերի տնօրենի տեղակալ։ Ավելի ուշ՝ 2011-2015 թվականներին, աշխատել է ՀՀ նախագահի աշխատակազմում՝որպես «Հանրային կապերի և տեղեկատվության կենտրոն» ՊՈԱԿ-ի տնօրենի խորհրդական։

Կարեն Բեքարյանը նաև ակտիվ գործունեություն է ծավալել ակադեմիական ոլորտում՝ դասավանդելով Հայ-ռուսական, Հայաստանում ֆրանսիական և Երևանի պետական համալսարաններում։

2002-2018 թվականներին նա նախագահել է «Եվրոպական ինտեգրացիա» ՀԿ-ն, իսկ 2009-2015 թվականներին եղել է ՀՀ հանրային խորհրդի անդամ։ 

Կարեն Բեքարյանը երկու անգամ ընտրվել է ԱԺ պատգամավոր՝ նախ՝ 2015-2017 թվականներին, ապա՝ 2017 թվականի ապրիլից՝ ընդգրկված լինելով ՀՀԿ համապետական ընտրական ցուցակում։ Լինելով անկուսակցական պատգամավոր՝ եղել է իշխող «Հանրապետական» (ՀՀԿ) խմբակցության անդամ, աշխատել ԱԺ արտաքին հարաբերությունների մշտական հանձնաժողովում։

Քաղաքական գործունեությունը դադարեցնելուց հետո 2019 թվականի հունվարին նախկին պատգամավորներ Միհրան Հակոյանի, Սամվել Ֆարմանյանի և Արման Սաղաթելյանի հետ հիմնադրել է «Քառյակ մեդիա» ՓԲԸ-ն, որի կազմում էին «Թերթ էյ եմ» ՍՊԸ-ն, «Արմնյուզ» ՓԲԸ-ն, «Ռադիո 107 ՖՄ» ՍՊԸ-ն։ Այս լրատվամիջոցները մինչ այդ ՀՀ երրորդ նախագահ Սերժ Սարգսյանի փեսա Միքայել Մինասյանի հետ կապվող «Պանարմենիան» մեդիա հոլդինգի մեջ էին։

Ըստ «Քառյակ մեդիա» ՓԲԸ-ի Իրական շահառուների հայտարարագրի՝ 2025 թվականին դուրս է եկել ընկերությունից՝ իր 25% մասնաբաժինը փոխանցելով Միհրան Հակոբյանին։

2021 թվականի փետրվարին Կարեն Բեքարյանին (նույն գործով նաև Ազգային ժողովի աշխատակազմի նախկին ղեկավար-գլխավոր քարտուղար Արա Սաղաթելյանին) մեղադրանք է առաջադրվել մի շարք հոդվածներով, այդ թվում՝ ազգային թշնամանք հրահրելու և ռազմական դրության կանոնները խախտելու համար։ Ըստ քննչական մարմինների՝ մեղադրանքի հիմքում «Գագիկ Սողոմոնյան» կեղծ օգտահաշվի կառավարմանը մասնակցությունն էր, որը 44-օրյա պատերազմի օրերին քննադատել էր իշխանություններին։

Կարեն Բեքարյանը ձերբակալվել, 3 օր անց ազատ էր արձակվել։

Միքայել Մինասյանը Հայաստանի երրորդ նախագահ Սերժ Սարգսյանի փեսան է: Մինասյանը մի շարք պաշտոններ է զբաղեցրել։ 2005-2013-ը եղել է Սան Մարինոյի Հանրապետության հյուպատոսը Հայաստանում։ 2007-2008-ը՝ վարչապետի օգնական, 2008-2012-ը զբաղեցրել է նախագահի աշխատակազմի ղեկավարի առաջին տեղակալի պաշտոնը։ 2013-2018-ը Վատիկանում Հայաստանի դեսպանն էր։ Համատեղության կարգով, 2017-2018-ը եղել է Պորտուգալիայի Հանրապետությունում ՀՀ դեսպանը։ 2018 թվականին Հայաստանում սկսված հակակառավարական ցույցերի հետևանքով Սերժ Սարգսյանը ապրիլի 23-ին հրաժարական տվեց Հայաստանի վարչապետի պաշտոնից։ Հետագայում Միքայել Մինասյանը ետ կանչվեց դեսպանի պաշտոնից, ապա լքեց Հայաստանը։ Նրա նկատմամբ քրեական գործ է հարուցվել փողերի լվացման մեղադրանքով։ Մինասյանն  արտերկրից սկսել էր տեսաուղերձներ հրապարակել, որոնցում քննադատում էր ներկայիս իշխանությունների գործունեությունը։ 

Մինչև 2019-ը «Արմենիա Թի-վի»-ն «Պանարմենիան Մեդիա Գրուպի» կազմում է եղել։ Այն ներառել է «Արմենիա Թի-վի», «Ա-Թիվի», «Արմնյուզ», «Պանարմենիան TV» (ԱՄՆ), հեռուստաընկերությունները, tert.am և blognews.am կայքերը, «Ռադիո Ջան» և «Լավ Ռադիո» ռադիոկայանները։ Մամուլի հրապարակումների համաձայն՝ «Պանարմենիան Մեդիա Գրուպի» իրական սեփականատերը Վատիկանում Հայաստանի նախկին դեսպան Միքայել Մինասյանն է եղել։

 2019-ին կազմակերպությունը դադարեցրեց գործունեությունը որպես մեդիա միավորում։ Այդ մասին տարածած հաղորդագրության մեջ ասվում էր. «Արմենիա» հեռուստաընկերության բաժնետոմսերի 100%-ն արդեն հանդիսանում է ռուսական «Քոմեդի քլաբ պրոդաքշընի» հիմնադիր Արթուր Ջանիբեկյանի ընտանիքի սեփականությունը»։ Ռոբերտ Հովհաննիսյանը Արթուր Ջանիկբեկյանի կնոջ եղբայրն է։ Իրավաբանական անձանց պետական ռեգիստրի համաձայն՝ 2018-ից հեռուստաընկերության բաժնետոմսերի 100%-ը պատկանում է Ռոբերտ Հովհաննիսյանին։