Արմեն Թավադյանը 2018 թվականին «Շարկ» ՍՊԸ-ի միջոցով հիմնադրել է «5-րդ ալիք» հեռուստաընկերությունը, որի միակ բաժնետերն է։ Հեռուստաընկերությունը ստեղծվել է նախկին «Արարատ» հեռուստաընկերության հիմքի վրա։

Թավադյանը 1993-2005 թվականներին ղեկավարել է Մոսկվայում Լեռնային Ղարաբաղի ներկայացուցչությունը։ 1990-ականներին մասնակցել է ղարաբաղյան պատերազմին։

2019 թվականին Թավադյանին մեղադրանք էր առաջադրվել նախկին նախագահ Ռոբերտ Քոչարյանի դատավարության ընթացքում արդարադատությանը խոչընդոտելու փորձի համար։ Դատական հետապնդումը 2022 թվականին դադարեցվել է վաղեմության ժամկետի հիմքով։

Մեդիայի հրապարակումների համաձայն՝ Թավադյանը մասնակցել է Քոչարյանին աջակցող հանրահավաքներին։ Երբ նրան հարցրել են «5-րդ ալիքի» սեփականատիրոջ կարգավիճակով շահերի բախման հնարավորության մասին, Թավադյանը հայտարարել է, որ չի միջամտում հեռուստաընկերության գործունեությանը։

Հարություն Հարությունյանը 2018-ից մինչ օրս «5-րդ ալիք»-ի տնօրենն է։ 1993 թվականից աշխատում է մեդիա ոլորտում։ Թղթակցել է «Այժմ», «Իրավունք» թերթերին և «Փաստ» լրատվական ծառայությանը: 1998-ին աշխատել է Հայաստանի ազգային հեռուստատեսությունում որպես գործադիր տնօրենի տեղակալ, 2004-2010թթ․-ին՝ Հանրային հեռուստատեսության «Հայլուր» լրատվական ծառայության տնօրեն։ 2010-ին եղել է «Երկիր» օրաթերթի գլխավոր խմբագիրը, 2013-ին՝ «Անդին» գրական հանդեսի խմբագրական խորհրդի անդամ: 2011-2016թթ․-ին՝ Հեռուստատեսության և ռադիոյի ազգային հանձնաժողովի անդամ: 2016-2018-ին եղել է Հանրային հեռուստաընկերության լրատվական և վերլուծական հաղորդումների տնօրենը:

 2004 թվականից Հարություն Հարությունյանը 20% մասնակցություն ունի «Այդիա-էս» ՍՊ ընկերությունում, որը, ըստ ՊԵԿ-ի տվյալների, զբաղվում է օծանելիքի և կոսմետիկական միջոցների մեծածախ առևտրով։

Արտակ Հերիքյանը «5-րդ ալիք» հեռուստաընկերության լրատվական ծառայության ղեկավարն է։ Մինչ այդ աշխատել է Հանրային հեռուստաընկերությունում՝ որպես թղթակից և եվրոպական գրասենյակի ղեկավար։ 2011-ին եղել է «Առաջին» լրատվական ծրագրի մեկնաբանը և պրոդյուսերը, իսկ 2012-ին նշանակվել է «Արմենիա» հեռուստաընկերության «Ժամը» ծրագրի տնօրեն։ 2016-2018 թվականներին եղել է Հանրային հեռուստաընկերության լրատվական հաղորդումների ղեկավար-պրոդյուսեր։ Ներկայումս նաև «5-րդ ալիք» հեռուստաընկերության էթիկայի հանձնաժողովի անդամ է։

Արփինե Հովհաննիսյանը մասնագիտությամբ իրավաբան է, նախկինում զբաղվել է քաղաքականությամբ։ Տարբեր պաշտոններ է զբաղեցրել, որոնցից առավել կարևորները՝ Արդարադատության նախարար և Ազգային ժողովի փոխնախագահ։ 2019 թվականին դադարեցրել է անդամակցությունը Հայաստանի հանրապետական կուսակցությանը և զբաղվում է իրավաբանությամբ։ Նա «5-րդ ալիք»-ի էթիկայի հանձնաժողովի անդամ է՝ համաձայնությամբ։

արդան Ալոյանը լրագրող և պրոդյուսեր է։ 1974-1979 թթ. սովորել է Մ. Գորկու անվան Գրականության ինստիտուտի ժուռնալիստիկայի ֆակուլտետում։ 1981-1989 թթ. թղթակցել է «Կոմունիստ» թերթին, իսկ 1989-2000 թթ. «Կոմսոմոլսկայա պրավդա» թերթի թղթակիցն էր Հայաստանում։ 2000-2004 թթ. եղել է «Ռեսպուբլիկա Արմենիա» թերթի գլխավոր խմբագիր, 2004-2014 թթ.՝ «Սի-Էս Փաբլիշինգ Հաուզ» հրատարակչության տնօրեն։ 2015-2016 թթ. ղեկավարել է «Հարավկովկասյան երկաթուղի» ՓԲԸ-ի հասարակայնության հետ կապերի ծառայությունը և եղել գլխավոր տնօրենի մամուլի քարտուղար։ 2017-ից՝ Հայաստանի ժուռնալիստների միության նախագահի տեղակալ, իսկ 2018-ից՝ Sputnik Արմենիա մամուլի կենտրոնի պրոդյուսեր։ Վարդան Ալոյանը նաև «5-րդ ալիք» հեռուստաալիքի էթիկայի հանձնաժողովի անդամ է՝ համաձայնությամբ։

Հակոբ Ավետիքյանը ավարտել է Երևանի պետական համալսարանի բանասիրական ֆակուլտետը (1970)։ 1970-1980 թթ. աշխատել է Բեյրութի «Զարթոնք» պաշտոնաթերթում՝ սկզբում որպես թղթակից, իսկ 1980-1990 թթ.՝ որպես գլխավոր խմբագիր։ 1990-ին վերադարձել է Հայաստան և հիմնել «Ազգ» օրաթերթը, որը խմբագրում է մինչ օրս։ Անդամակցում է Լիբանանի լրագրողների միությանը, Հայաստանի ժուռնալիստների միությանը։ «Թեքեյան» մշակութային միության վարչության անդամ է։ «5-րդ ալիք» հեռուստաալիքի էթիկայի հանձնաժողովի անդամ է՝ համաձայնությամբ։

Ռուբեն Մելիքյանը իրավագետ է, դասավանդում է Երևանի պետական համալսարանի իրավագիտության ֆակուլտետում՝քրեական դատավարության և կրիմինալիստիկայի ամբիոնի դոցենտ է։ Աշխատել է ՀՀ Վճռաբեկ դատարանում, եղել է ՀՀ արդարադատության նախարարի տեղակալ, ՀՀ արդարադատության ակադեմիայի ռեկտոր, այնուհետև նշանակվել է Լեռնային Ղարաբաղի Մարդու իրավունքների պաշտպան։ Հիմնադրել է «Իրավական ուղի» հասարակական կազմակերպությունը։ «5-րդ ալիք» հեռուստաալիքի էթիկայի հանձնաժողովի անդամ է՝ համաձայնությամբ։