Արմեն Թավադյան

Արմեն Թավադյանը կրթություն է ստացել Հայաստանում և Ռուսաստանի Դաշնությունում։ 1993-2005 թվականներին ղեկավարել է Մոսկվայում Լեռնային Ղարաբաղի Հանրապետության ներկայացուցչությունը։

Բացի «Շարկ» ՍՊԸ-ից («5-րդ ալիք»), նա մասնակցություն է ունեցել նաև այլ ընկերություններում։ 2018-2021թթ. Թավադյանը 49% մասնակցություն է ունեցել panaroma.am կայքը տնօրինող «Պանորամա էյէմ» ՍՊԸ-ում։ Այդ մասնաբաժինը ձեռք էր բերել Արա Սաղաթելյանից, որին էլ 2021-ին վերադարձրել է մասնաբաժինը։ Արա Սաղաթելյանը երրորդ նախագահ Սերժ Սարգսյանի պաշտոնավարման ժամանակ՝ 2009-2017 թթ. եղել է ՀՀ նախագահի աշխատակազմի «Հանրային կապերի եւ տեղեկատվության կենտրոն» ՊՈԱԿ-ի տնօրեն: 2017-2018թթ.`  ՀՀ Ազգային ժողովի աշխատակազմի ղեկավար-գլխավոր քարտուղար:

​​Մի շարք լրատվամիջոցների եւ մասնագիտական միավորումների հիմնադիր է:

Արմեն Թավադյանի մյուս ընկերությունները, որոնցում նա մասնակցություն է ունեցել, ժամանակավորապես դադարեցրել են     իրենց գործունեությունը։ Բիզնեսից բացի, Արմեն Թավադյանը հիմնադրել է նաև երկու հասարակական կազմակերպություն, որոնցից մեկի՝ «Հաղթանակ» քաղաքացիա-իրավական ՀԿ-ի գործունեությունը ժամանակավորապես դադարեցված է։ Այդ ՀԿ-ի առաքելությունը մարդու իրավունքների պաշտպանությունն ու ժողովրդավարական ինստիտուտների ամրապնդումն էր։ Իսկ մյուսը՝ «Միասին» բարեգործական ՀԿ-ն, որը հիմնադրվել է 2021 թվականին, զբաղվում է սոցիալական խնդիրների լուծմամբ կամավորների ներգրավման միջոցով։ 

Արմեն Թավադյանի անունը լրատվամիջոցների ուշադրության կենտրոնում հայտնվեց 2019 թվականին։ 2018 թվականի իշխանափոխությունից հետո ՀՀ երկրորդ նախագահ Ռոբերտ Քոչարյանին մեղադրանք առաջադրվեց 2008 թվականի Մարտի 1-ի գործով: 

2008 թվականի նախագահական ընտրությունների արդյունքները չընդունող քաղաքացիները ցույցի էին դուրս եկել։  Ցուցարարների և ոստիկանության միջև բախումների հետեւանքով մահացել էր ութ քաղաքացիական անձ և երկու ոստիկան։ 

Այս դատավարության շրջանակում Արմեն Թավադյանին առանձին մեղադրանք էր առաջադրվել։ Նախաքննական մարմինը նրան ներկայացնում էր որպես Ռոբերտ Քոչարյանի մտերիմ և մեղադրում արդարադատությանը խոչընդոտելու փորձի մեջ։ Մասնավորապես, նա մեղադրվում էր մարդկանց գումարով շահագրգռելու եւ հօգուտ Ռոբերտ Քոչարյանի սուտ ցուցմունքներ տալուն դրդելու մեջ։ Վաղեմության ժամկետն անցած լինելու հիմքով 2022 թ. դատարանի որոշմամբ Արմեն Թավադյանի նկատմամբ քրեական հետապնդումը դադարեցվեց։

Արմեն Թավադյանը մասնակցում էր նաև Ռոբերտ Քոչարյանի դատավարության ընթացքում դատարանի դիմաց նրա աջակիցների կազմակերպած բողոքի ակցիաներին։ Ակցիաներից մեկի ընթացքում ընդդեմ Քոչարյանի ցույց անող ակտիվիստ Վարդգես Գասպարիի վրա շիշ շպրտելու համար Արմեն Թավադյանն էր մեղադրվում։ Վերջինս հերքել էր մեղադրանքները։ «Ազատություն» ռադիոկայանի հարցին՝ արդյոք շահերի բախում չի տեսնում նրանում, որ «5-րդ ալիք»-ի սեփականատերն ակտիվորեն մասնակցում է ի պաշտպանություն Ռոբերտ Քոչարյանի ցույցերին, Արմեն  Թավադյանը պատասխանել է, որ չի խառնվում «5-րդ ալիք»-ի ներքին գործերին։ [...] Ես ընդամենը սեփականատեր եմ: Մասնագիտական գործերին ես չեմ խառնվում»։