Կիմա Մկրտչյան

Logo of Կիմա Մկրտչյան

Կիմա Մկրտչյանը «Դարեսկիզբ» ՍՊ ընկերության 70% փայատեր է դարձել 2014 թվականին, երբ նրա դուստրը՝ Աննա Հակոբյանը, իրեն պատկանող 70%-ը փոխանցել է մորը։ Աննա Հակոբյանը ՀՀ վարչապետ Նիկոլ Փաշինյանի կինն է։


Մոր և դստեր միջև կայացած գործարքը դատական վեճի առարկա է դարձել։ Ընկերության մասնակիցներից Պետրոս Մակեյանը դատական հայց է ներկայացրել ընդդեմ «Դարեսկիզբ» ընկերության՝ կանոնադրությունում կատարված փոփոխության առնչությամբ։ 2014 թվականի հունվարի 20-ին ընկերության մասնակիցների արտահերթ ժողով է հրավիրվել, և կանոնդրության մեջ փոփոխություն է կատարվել, ըստ որի՝ Աննա Հակոբյանն իր 70% փայը նվիրել է Կիմա Մկրտչյանին։ Դատական հայցում նշված է, որ Պետրոս Մակեյանը չի մասնակցել այդ ժողովին և  միայն 2021 թվականի սեպտեմբերին է տեղեկացել այդ փոփոխության մասին։ Նա այս առիթով հանցագործության մասին հաղորդում է ներկայացրել, 2022-ի օգոստոսին Քնչական կոմիտեում քրեական վարույթ է նախաձեռնվել։ Քաղաքացիական դատարանում քննվող գործը ժամանակավորապես դադարեցվել է այն հիմքով, որ այս գործին վերաբերող քրեական վարույթ է նախաձեռնվել։ 2025 թվականի հունիսին պարզվել է, որ քրեական վարույթը կարճվել է և դատարանը որոշել է քաղաքացիական գործի վարույթը վերսկսել, քանի որ վերացել է դրա կասեցումն առաջացրած հանգամանքը: Մինչ 2025-ի հոկտեմբերը մի քանի նիստ է կայացել։


Կիմա Մկրտչյանը լրագրողների ուշադրության կենտրոնում հայտնվեց այն պատճառով, որ իր հայտարարագրում չէր նշել առևտրային ընկերություններում մասնակցության մասին։ «Հետք» առցանց լրատվամիջոցը գրել է, որ նա հայտարարատու անձ է, քանի որ նրա որդին՝ Հրաչյա Հակոբյանը, Ազգային ժողովի պատգամավոր է։ Ըստ «Հետքի»՝ Կիմա Մկրտչյանը 2019 և 2020 թվականի հայտարարագրերում ոչինչ չի գրել առևտրային ընկերություններում իր մասնակցության մասին։

Մեդիա ընկերություններ / խմբեր

Լրատվամիջոցներ

Փաստեր

Այլ լրատվամիջոցներ

Հրատարակչություն

  • Նիկան հրատարակչություն ՍՊԸ (80%)

Փոխկապակցված շահեր (ընտանիք և ընկերներ)
  • Աննա Հակոբյան
    Աննա Հակոբյանը 2013 թվականից մինչ օրս Հայկական ժամանակի գլխավոր խմբագիրն է։ Աննա Հակոբյանը՝ ՀՀ վարչապետ Նիկոլ Փաշինյանի կինը, «Դարեսկիզբ» ՍՊԸ-ի հիմնադիրներից մեկն է, ընկերությունում 50% մասնակցություն է ունեցել։ 2002 թվականին ընկերության հիմնադիրներից չորսը իրենց 10- ական տոկոս փայը` ընդհանուր 40%, փոխանցել են երկու անձի՝ Աննա Հակոբյանին և Հայկ Գևորգյանին, յուրաքանչյուրին` 20-ական տոկոս։ Աննա Հակոբյանի մասնաբաժինը դարձել է 70%։ 2014 թվականին նա իր մասնաբաժինը փոխանցել է Կիմա Մկրտչյանին՝ մորը։ «Դարեսկիզբ» ՍՊԸ-ին է պատկանում «Հայկական ժամանակ» առցանց լրատվամիջոցը։ Աննա Հակոբյանն ավարտել է Երևանի պետական համալսարանի լրագրության ֆակուլտետը։ 2003 թվականից լրագրող է աշխատել «Հայկական ժամանակ» օրաթերթում։ 2013 թվականից մինչ օրս «Հայկական ժամանակի» գլխավոր խմբագիրն է։ Նա «Իմ քայլը» հիմնադրամի նախագահն է։ 2018-ից մինչև 2020 թվականը ղեկավարել է City of smile («Սիթի օֆ սմայլ») բարեգործական հիմնադրամի հոգաբարձուների խորհուրդը։ Աննա Հակոբյանը հաճախ լրատվամիջոցների ուշադրության կենտրոնում է հայտնվում սոցիալական ցանցերում իր գրառումների համար։ Նա պարբերաբար մեկնաբանում է նախկինում քաղաքականությամբ զբաղված կամ այժմ ընդդիմությունը ներկայացնող քաղաքական գործիչների հայտարարությունները՝ երբեմն օգտագործելով վիրավորական արտահայտություններ։
  • Հրաչյա Հակոբյան
    Հրաչյա Հակոբյանը 2005 թվականին ավարտել է Երևանի թատրոնի և կինոյի պետական ինստիտուտը։ Նա իր դերասանական կարիերան սկսել է Երևանի խամաճիկների պետական թատրոնում, որտեղ աշխատել է 2003-2008 թվականներին, իսկ 2009-2010 թվականներին եղել է Երևանի պետական կամերային երաժշտական թատրոնի դերասան։ Հրաչյա Հակոբյանը նկարահանվել է գեղարվեստական ֆիլմերում։ Զուգահեռաբար, զբաղվել է նաև մեդիայով։ 2000-2008 թվականներին Հակոբյանը եղել է «Հայկական Ժամանակ» օրաթերթի տպագրության պատասխանատուն, իսկ ավելի ուշ՝ 2013-2015 թվականներին, Armtimes.com («Հայկական Ժամանակ») կայքի ադմինիստրատոր։ Բացի այդ, 2009-2013 թվականներին նա զբաղեցրել է «Մեր տպարանը» ՍՊԸ փոխտնօրենի պաշտոնը, որի գործունեությունը այժմ, ըստ ՊԵԿ-ի տվյալների, ժամանակավորապես դադարեցված է։ Հրաչյա Հակոբյանը երեք անգամ ընտրվել է Ազգային Ժողովի պատգամավոր։ Առաջին անգամ՝ 2018-2019 թվականներին, եղել է «Ելք» խմբակցության անդամ։ Այս ընթացքում նա ընդգրկված է եղել ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի կազմում։ Հաջորդիվ՝ 2019-2021 թվականներին, արտահերթ խորհրդարանական ընտրություններում նա կրկին ընտրվել է պատգամավոր, այս անգամ՝ «Իմ քայլը» կուսակցությունների դաշինքի տարածքային ընտրական ցուցակով, դառնալով «Իմ քայլը» խմբակցության անդամ։ Այս ժամանակահատվածում նա աշխատել է ԱԺ առողջապահության և սոցիալական հարցերի մշտական հանձնաժողովում։ 2021 թվականի հունիսի 20-ին Հրաչյա Հակոբյանը երրորդ անգամ ընտրվել է ԱԺ պատգամավոր՝ «Քաղաքացիական պայմանագիր» կուսակցության համապետական ընտրական ցուցակով։
  • Նիկոլ Փաշինյան
    Նիկոլ Փաշինյանը մասնագիտությամբ լրագրող է, սովորել է Երևանի պետական համալսարանի բանասիրության ֆակուլտետի ժուռնալիստիկայի բաժնում։ Սակայն ուսումը չի ավարտել՝ ավարտական կուրսում հեռացվել է համալսարանից, ինչպես նշված է իր կենսագրականում՝ «քաղաքական դրդապատճառներով»։ Նա 1992 թվականից ակտիվորեն համագործակցել է տարբեր թերթերի հետ, ապա 1998 թվականին հիմնադրել «Օրագիր» օրաթերթը, որը 1999 թվականին քաղաքական պատճառներով դատական կարգով փակվել է։ 1999 թվականին դարձել է «Հայկական ժամանակ» օրաթերթի գլխավոր խմբագիրը և այդ պաշտոնը զբաղեցրել մինչև 2012 թվականը։ 2006-2008թթ. եղել է «Դարեսկիզբ» ՍՊԸ-ի տնօրենը։ Լրագրողական գործունեության ընթացքում նրա նկատմամբ հարուցվել են մի շարք քրեական գործեր զրպարտության եւ վիրավորանքի մեղադրանքներով։ 1999 թվականի օգոստոսին դատապարտվել է մեկ տարվա պայմանական ազատազրկման։ Ավելի ուշ՝ միջազգային և Հայաստանի լրագրողական հանրության պահանջով վերաքննիչ դատարանը ազատազրկման ի կատար ածումը հետաձգել է մեկ տարով, ինչի արդյունքում ազատազրկումն ի կատար չի ածվել: Քաղաքական ուղին Նիկոլ Փաշինյանը սկսել է որպես ընդդիմադիր գործիչ՝ 2006 թվականին մասնակցելով «Այլընտրանք» հասարակական-քաղաքական նախաձեռնության հիմնադրմանը։ 2007 թվականի խորհրդարանական ընտրություններում եղել է «Իմպիչմենթ» դաշինքի ցուցակի առաջին համարը, իսկ 2008 թվականի նախագահական ընտրություններում՝ Լևոն Տեր-Պետրոսյանի նախընտրական շտաբի անդամ։ 2008 թվականի մարտի 1-ի իրադարձություններից հետո, լինելով հետախուզման մեջ, մեկ տարի չորս ամիս անցկացրել է ընդհատակում։ 2009 թվականի հուլիսի 1-ին ինքնակամ ներկայացել է դատախազություն, ձերբակալվել և 2010 թվականի հունվարին դատապարտվել յոթ տարվա ազատազրկման՝ զանգվածային անկարգություններ կազմակերպելու մեղադրանքով։ Բանտում անցկացնելով մեկ տարի 11 ամիս՝ ազատ է արձակվել 2011 թվականի մայիսի 27-ին՝ համաներման որոշմամբ։ Բանտից ազատվելուց հետո, 2012 թվականի խորհրդարանական ընտրություններում ընտրվել է ԱԺ պատգամավոր «Հայ ազգային կոնգրես» դաշինքի համամասնական ցուցակով։ 2013 թվականին նա հիմնադրել է «Քաղաքացիական պայմանագիր» հանրային-քաղաքական միավորումը, որի հենքի վրա 2015-ին ձևավորվել է համանուն կուսակցությունը։ 2017 թվականի ապրիլի 2-ի ԱԺ ընտրություններում «ԵԼՔ» դաշինքի ընտրական ցուցակով կրկին ընտրվել է պատգամավոր, և 2017 թվականի մայիսից եղել է «ԵԼՔ» խորհրդարանական խմբակցության ղեկավարը։ 2018 թվականին Նիկոլ Փաշինյանը սկսեց «Իմ քայլը» անվամբ շարժումը, որի արդյունքում վարչապետ Սերժ Սարգսյանը հրաժարական տվեց։ Նիկոլ Փաշինյանն ընտրվեց ՀՀ վարչապետ։ Այժմ Նիկոլ Փաշինյանի ղեկավարման երրորդ ժամկետն է, որը կլրանա 2026 թվականին։ Նրա ղեկավարած ՔՊ կուսակցությունը պատրաստվում է մասնակցել 2026 թվականի ընտրություններին։
Տվյալները հասանելի են
սեփականության մասին տվյալներ
Վերնագրեր
Մետատվյալներ

Կիմա Մկրտչյանի մասին սուղ տեղեկություններ կան բաց աղբյուրներում։ Տեղեկատվությունը հիմնականում ստացել ենք պետական ռեգիստրներից և լրավամիջոցների հրապարակումներից։

Աղբյուրներ
Փաստաթղթեր (PDF)
  • Dareskizb LLC profile (Armenian)
    File
  • Dareskizb LLC profile (Armenian)
    File
  • Dareskizb LLC CEO (Armenian)
    File
  • Dareskizb LLC owners (Armenian)
    File
  • Dareskizb LLC charter (Armenian)
    File
  • Dareskizb LLC updated (Armenian)
    File
  • Dareskizb LLC updated (Armenian)
    File
  • Dareskizb LLC financial report (Armenian)
    Link File
  • MOM request to Haykakan Zhamanak(Armenian)
    File