Միհրան Հակոբյան
Միհրան Հակոբյանը «Քառյակ Մեդիա» ՓԲԸ-ի համահիմնադիրներից է։
Ծնվել է 1984 թվականի հուլիսի 15-ին Երևանում։ Միջազգայնագետ է, պատմական գիտությունների թեկնածու։
Մեդիայի հետ կապ ունեցել է դեռ երիտասարդ տարիներից. 2003-2005թթ. թղթակցել է «Երկիր» եւ «168 ժամ» թերթերին: Դրանից հետո անցում է կատարել հեռուստատեսային արտադրություն, 2014-2015թթ. եղել է «Արմենիա» հեռուստաընկերության «Ժամը» լրատվականի պրոդյուսեր, 2015-2017թթ.՝ «Արարատ» հեռուստաընկերության լրատվական-քաղաքական ծրագրերի տնօրեն:
Քաղաքական գործունեություն Միհրան Հակոբյանը սկսել է 2011 թվականից՝ դառնալով այդ ժամանակ իշխող Հայաստանի հանրապետական կուսակցության (ՀՀԿ) խորհրդի անդամ։ 2011-2014թթ. եղել է ՀՀ վարչապետ Տիգրան Սարգսյանի օգնականը։
2017 թվականին ՀՀԿ համապետական ընտրական ցուցակով Հակոբյանն ընտրվել է Ազգային ժողովի 6-րդ գումարման պատգամավոր։
2019 թվականի հունվարին դադարեցրել է ՀՀԿ-ին անդամակցությունն ու Սամվել Ֆարմանյանի, Արման Սաղաթելյանի և Կարեն Բեքարյանի հետ հիմնադրել «Քառյակ մեդիա» ՓԲԸ-ն, որի կազմում էին «Թերթ էյ եմ» ՍՊԸ-ն, «Արմնյուզ» ՓԲԸ-ն, «Ռադիո 107 ՖՄ» ՍՊԸ-ն։ Այս լրատվամիջոցները մինչ այդ ՀՀ երրորդ նախագահ Սերժ Սարգսյանի փեսա Միքայել Մինասյանի հետ կապվող «Պանարմենիան» մեդիա հոլդինգի մեջ էին։
2018 թվականի իշխանափոխությունից հետո, որպես ընդդիմադիր գործիչ Միհրան Հակոբյանը հայտնվել է մի շարք միջադեպերի կենտրոնում։
2020 թվականի դեկտեմբերին Հակոբյանը, իր տված հարցազրույցներից մեկի ընթացքում խոսելով Հայաստանում տիրող իրավիճակի մասին, որպես պատմական օրինակ մատնանշել էր Ռումինիայի նախագահ Նիկոլաե Չաուշեսկուի ընտանիքի պատմությունը։ Չաուշեսկու ընտանիքը ռումինական տրիբունալի կողմից դատապարտվել էր մահապատժի։ Միհրան Հակոբյանին մեղադրանք էր առաջադրվել բռնությունը հրապարակայնորեն արդարացնելու համար, սակայն շուրջ կես տարվա քննությունից հետո Հակոբյանի նկատմամբ քրեական հետապնդումը դադարեցվել է՝ հանցակազմի բացակության հիմքով, նրա վերաբերյալ քրեական գործը՝ կարճվել։
Միհրան Հակոբյանի նկատմամբ մի քրեական հետապնդում էլ սկսվել էր 2020 թվականի նոյեմբերի 19-ին Բաղրամյան պողոտա-Դեմիրճյան խաչմերուկ հատվածում հավաք կազմակերպելու եւ անցկացնելու փաստի առթիվ հարուցված քրեական գործի շրջանակում։
Ըստ Քննչական կոմիտեի՝ Հակոբյանը Հայաստանում ռազմական դրություն հայտարարելու մասին որոշման հավելվածում սահմանված կարգն էր խախտել, որով արգելվում էր ռազմական դրության պայմաններում ՀՀ ամբողջ տարածքում հավաքների, գործադուլների կազմակերպումը, անցկացումը և դրանց մասնակցելը։
2020 թվականի դեկտեմբերին կառավարությունը վերացրել էր այս սահմանափակումների արգելքը, սակայն Հակոբյանի նկատմամբ քրեական հետապնդումը դադարեցնելու՝ պաշտպանի միջնորդությունը 2021 թվականի հունվարին մերժվել էր։ Ի վերջո, երկար քննությունից հետո 2022 թվականի փետրվարին հանցակազմի բացակայությամբ այս գործը ևս կարճվել է։
Մեդիա ընկերություններ / խմբեր
Լրատվամիջոցներ
Փաստեր
| Այլ լրատվամիջոցներ | Ռադիո
|
|---|---|
| Այլ՝ մեդիայի հետ առնչվող բիզնեսներ | Կինո և տեսաֆիլմերի, հեռուստատեսային ծրագրերի արտադրություն
|
| Փոխկապակցված շահեր (ընտանիք և ընկերներ) |
|
|---|