Սամվել Ֆարմանյան

Սամվել Ֆարմանյանը «Քառյակ Մեդիա» ՓԲԸ-ի համահիմնադիրներից է։

Ծնվել է 1978թ. փետրվարի 17-ին Շիրակի մարզի Սպանդարյան գյուղում: Պատմական գիտությունների թեկնածու է:

2003-2005թթ. «Բաց հասարակության ինստիտուտի օժանդակության հիմնադրամ»-ի հայաստանյան մասնաճյուղում աշխատել է «Քաղաքացիական հասարակություն» եւ «Զանգվածային լրատվության միջոցներ» ծրագրերի համակարգող:

2005-2006թթ. եղել է արտաքին քաղաքականության եւ արտաքին կապերի հարցերով ԱԺ նախագահի խորհրդական: 2008թ. ապրիլին նշանակվել է ՀՀ նախագահի (Սերժ Սարգսյան) ռեֆերենտ, մայիսին` ՀՀ նախագահի մամուլի քարտուղար:

2010-2012թթ. աշխատել է ՀՀ հանրային հեռուստաընկերության և Հանրային ռադիոընկերության լրատվական և վերլուծական հաղորդումների տնօրեն:

2012-ից Ֆարմանյանը քաղաքական գործունեություն է սկսել։ Նույն տարում անդամակցել է իշխող Հայաստանի հանրապետական կուսակցությանը, 2016թ.՝ դարձել ՀՀԿ գործադիր մարմնի անդամ:

2012-2017թթ. եղել է Ազգային ժողովի 5-րդ գումարման պատգամավոր, ԱԺ արտաքին հարաբերությունների մշտական հանձնաժողովի անդամ: Եղել է Հայաստան-ԵՄ խորհրդարանական համագործակցության հանձնաժողովի հայաստանյան պատվիրակության ղեկավար, ԵԽԽՎ հայաստանյան պատվիրակության անդամ:

2017թ. ԱԺ 6-րդ գումարման պատգամավոր է ընտրվել ՀՀԿ համապետական ընտրական ցուցակով:

2018 թվականի իշխանափոխությունից հետո ընդդիմադիր դիրքերից քննադատում է Նիկոլ Փաշինյանի քաղաքականությունը։

2019 թվականի հունվարին դադարեցրել է ՀՀԿ-ին անդամակցությունն ու Միհրան Հակոբյանի, Արման Սաղաթելյանի և Կարեն Բեքարյանի հետ հիմնադրել «Քառյակ մեդիա» ՓԲԸ-ն, որի կազմում էին «Թերթ էյ եմ» ՍՊԸ-ն, «Արմնյուզ» ՓԲԸ-ն, «Ռադիո 107 ՖՄ» ՍՊԸ-ն։ Այս լրատվամիջոցները մինչ այդ ՀՀ երրորդ նախագահ Սերժ Սարգսյանի փեսա Միքայել Մինասյանի հետ կապվող «Պանարմենիան» մեդիա հոլդինգի կազմում էին։

Դասավանդել է Երևանի պետական համալսարանի պատմության ֆակուլտետում, Հայաստանի ամերիկյան համալսարանում։ Ամերիկյան համալսարանի հետ համագործակցությունը դադարեցրել է 2025 թվականի օգոստոսից, իր գնահատմամբ՝ քաղաքական ճնշումների պատճառով։