Սամվել Մայրապետյան

Logo of Սամվել Մայրապետյան

Սամվել Մայրապետյանը հայ գործարար է, հայտնի է էլիտար շենքերի շինարարության և անշարժ գույքի ոլորտներում բիզնես գործունեությամբ։ «Հայկական երկրորդ հեռուստաալիք» ՍՊԸ-ի տնօրենն ու 50% սեփականատերն է:


Մայրապետյանը սերտ հարաբերություններ է ունեցել նախկին իշխանությունների, հատկապես՝ երկրորդ նախագահ Ռոբերտ Քոչարյանի և նախկին փոխվարչապետ Արմեն Գևորգյանի հետ։ Ռոբերտ Քոչարյանի պաշտոնավարման տարիներին լայնածավալ կառուցապատում է իրականացրել Երևանի կենտրոնում՝ Հյուսիսային պողոտայում: Երկրորդ նախագահի որդու՝ Սեդրակ Քոչարյանի հետ համատեղ բիզնես ունի․ «Տոյոտա Երևան» ընկերության 60%-ի սեփականատերը Մայրապետյանն է, 30%-ինը՝ Սեդրակ Քոչարյանը։


2018 թվականի իշխանափոխությունից հետո Սամվել Մայրապետյանն անցնում է մի շարք քրեական գործերով, հետախուզման մեջ է։


Նա մեղադրվում է 7 միլիոն դոլար կաշառք ստանալուն օժանդակելու համար։ 2018-ի հոկտեմբերին նա ձերբակալվել, ապա կալանավորվել է։ Մեկ այլ գործարար՝ Սիլվա Համբարձումյանը, հայտարարել է, որ այդ գումարը տվել է Մայրապետյանին երկրի ղեկավարությանը՝ Ռոբերտ Քոչարյանին, Սերժ Սարգսյանին ու Արմեն Գևորգյանին փոխանցելու համար։ 


2018-ի հոկտեմբերից մինչ 2019-ի դեկտեմբեր Մայրապետյանը կալանքի տակ էր։ Հետագայում գրավով ազատ արձակվեց, և Հատուկ քննչական ծառայությունը (ՀՔԾ) թույլ տվեց գործարարին երկրից դուրս գալ՝ Գերմանիայում բուժվելու նպատակով։ 2020-ի մարտին պարզվեց, որ Մայրապետյանը խուսափել է ներկայանալ ՀՔԾ։ Նրա նկատմամբ հետախուզում է հայտարարվել, խափանման միջոց է ընտրվել կալանքը։

Մեդիա ընկերություններ / խմբեր

Լրատվամիջոցներ

Փաստեր

affiliated_business_interests

Անշարժ գույքի հանձնում վարձակալության

  • «Ժորժ» ՍՊԸ (100%, տնօրեն, Հայաստան)

  • «Պրոգրես-Արմենիա» ՍՊԸ (50%, Հայաստան)

  • «Լոկալ դիվելոփըրզ» ՍՊԸ (50%, Հայաստան)

 

Թեթև մարդատար ավտոմոբիլների մեծածախ առևտուր

  • «Տոյոտա Երևան» ՍՊԸ (60%, Հայաստան)

 

Հյուրանոցների տրամադրման ծառայություններ

  • «ԷՅՉ ԱՅ ՈՒԱՅ» ՍՊԸ (20%, Հայաստան)

 

Փայտամշակում

  • Փայտամշակման կենտրոն «Կարիտաս» ՍՊԸ (50%, Հայաստան)

 

Զբոսաշրջության ոլորտի ծառայություններ

  • «ԲԷԿ-Հոթել տուր» ՍՊԸ (50%, տնօրեն, Հայաստան)

Փոխկապակցված շահեր (ընտանիք և ընկերներ)
  • Գոհար Քյալյան
    Գոհար Քյալյանը Սամվել Մայրապետյանի կինը և նրա բիզնես գործընկերն է։ 2006-2011 թվականներին եղել է Երևանի Մխիթար Հերացու անվան պետական բժշկական համալսարանի (ԵՊԲՀ) ռեկտոր։ Գոհար Քյալյանը Սամվել Մայրապետյանի հետ համատեղ բաժնեմասեր ունի մի շարք ընկերություններում, որոնք զբաղվում են շինարարությամբ և անշարժ գույքով։ Քյալյանը ամուսնու հետ անցնում է քրեական գործերով (ապօրինի ծագում ունեցող գույք, փողերի լվացում)։ Նրա նկատմամբ 2023 թվականին հանրային քրեական հետապնդում է հայտարարվել։ Գոհար Քյալյանի առաջին ամուսինը եղել է Բժշկական գիտությունների դոկտոր, պրոֆեսոր Տիգրան Սուլթանյանը։ Նրանց որդին՝ Լևոն Սուլթանյանը, «Հայկական երկրորդ հեռուստաալիք»-ի փոխտնօրենն է և նույնպես ներգրավված է Մայրապետյանի բիզնեսում։ Լևոն Սուլթանյանը 10% բաժնեմաս ունի Մայրապետյանի եւ Սեդրակ Քոչարյանի «Տոյոտա Երեւան» ՍՊԸ-ում։
  • Արմեն Գևորգյան
    Արմեն Գևորգյանը քաղաքական գործիչ է, ՀՀ նախկին փոխվարչապետ, Սամվել Մայրապետյանի մերձավորը։ Ծնվել է 1973թ. Երևանում, կրթությունը ստացել է Ռուսաստանում և Նիդերլանդներում, ունի մանկավարժական գիտությունների թեկնածուի գիտական աստիճան: Պետական համակարգում աշխատանքը սկսել է 1997թ.՝ որպես վարչապետի օգնական, իսկ 1998-2008 թվականներին զբաղեցրել է առանցքային պաշտոններ՝ ՀՀ նախագահի օգնական, առաջին օգնական, ապա՝ նախագահի աշխատակազմի ղեկավար և միաժամանակ Ազգային անվտանգության խորհրդի քարտուղար: 2008-2014 թվականներին եղել է ՀՀ փոխվարչապետ և տարածքային կառավարման նախարար: 2021 թվականին ընտրվել է Ազգային ժողովի պատգամավոր «Հայաստան» դաշինքի ցուցակով: 2021թ․ մայիսին Հատուկ քննչական ծառայությունը հաղորդագրություն էր տարածել, ըստ որի՝ Արմեն Գևորգյանը հանցավոր ճանապարհով ստացել և օրինականացրել է ընդհանուր 4.9 մլրդ դրամ։ Մասնավորապես՝ Հայաստանի Հանրապետությունում եւ Չեխիայի Հանրապետությունում Արմեն Գևորգյանի հետ փոխկապակցված անձինք հիմնադրել են մի շարք ընկերություններ, որոնց անվամբ գրանցվել են անշարժ գույքեր: Բացի այդ, նշված անձինք բանկային գործարքների եղանակով շրջանառել են դրամական միջոցներ, սակայն ինչպես գնված անշարժ գույքերի շուկայական արժեքների, այնպես էլ՝ շրջանառված դրամական միջոցների հարաբերակցությունն էականորեն տարբերվել է իրենց ստացած օրինական եկամուտներից։ Արմեն Գևորգյանն անցնում է նաև «Մարտի 1-ի» աղմկահարույց գործով, որի շրջանակներում են քննվում նաև կաշառք ստանալու և փողերի լվացման մեղադրանքները՝ կապված Սամվել Մայրապետյանի գործի հետ: Գևորգյանի նկատմամբ որպես խափանման միջոց ընտրվել է չհեռանալու մասին ստորագրությունը: Նա մշտապես հերքել է իրեն առաջադրված բոլոր մեղադրանքները։
  • Լևոն Սուլթանյան
    Լևոն Սուլթանյանը Սամվել Մայրապետյանի կնոջ՝ Գոհար Քյալյանի որդին է առաջին ամուսնությունից։ «Հայկական երկրորդ հեռուստաալիքի» փոխտնօրենն է։ Ներգրավված է նաև Մայրապետյանի ու Քյալյանի այլ ընկերություններում։ «Տոյոտա Երևան» ՍՊԸ-ի 10%-ի սեփականատերն է։
  • Ռոբերտ Քոչարյան
    Ռոբերտ Քոչարյանը քաղաքական գործիչ է, եղել է Արցախի, ապա Հայաստանի Հանրապետության նախագահ։ 1988 թ. փետրվարից եղել է արցախյան շարժման քաղաքական առաջնորդներից: 1994-1997թթ. եղել է Լեռնային Ղարաբաղի Հանրապետության նախագահ: 1997 թ. մարտի 20-ին Հայաստանի նախագահ Լեւոն Տեր-Պետրոսյանը Ռոբերտ Քոչարյանին նշանակել է Հայաստանի Հանրապետության վարչապետ: 1998-ի փետրվարի 3-ին նախագահ Լեւոն Տեր-Պետրոսյանը հրաժարական է ներկայացրել` Արցախի հարցի կարգավորման շուրջ իշխանության ներսում առաջացած հակասությունների պատճառով։ Նրա հետ անհամաձայնություն ունեին վարչապետ Ռոբերտ Քոչարյանը, ներքին գործերի և ազգային անվտանգության նախարար Սերժ Սարգսյանը եւ պաշտպանության նախարար Վազգեն Սարգսյանը։ 1998 թ. մարտի 30-ին արտահերթ նախագահական ընտրություններում Ռոբերտ Քոչարյանն ընտրվել է ՀՀ նախագահ։ 2003 թ. մարտի 5-ին վերընտրվել է եւ պաշտոնավարել մինչեւ 2008թ.: Եվրոպական դիտորդական առաքելությունների գնահատմամբ՝ նշված երկու ընտրություններն էլ անցել են ընտրակեղծիքներով, գնահատվել ոչ արդար եւ թափանցիկ։ Նրա պաշտոնավարման ավարտն ուղեկցվեց Մարտի 1-ի ողբերգական իրադարձությամբ։ Ռոբերտ Քոչարյանը ցանկանում էր իշխանությունը փոխանցել վարչապետ Սերժ Սարգսյանին։ 2008-ի փետրվարի 19-ի նախագահական ընտրությունների պաշտոնական տվյալներով՝ Սերժ Սարգսյանը հավաքել էր ձայների 52.82%-ը, իսկ նրա մրցակից, առաջին նախագահ Լեւոն Տեր-Պետրոսյանը՝ 21.5%։ Տեր-Պետրոսյանը եւ նրա համակիրները, չհաշտվելով արդյունքների հետ, դրանք վիճարկեցին Սահմանադրական դատարանում՝ միաժամանակ հանրահավաքներ, նստացույցեր անելով։ Սակայն դեռեւս նախագահի պաշտոնը զբաղեցնող Ռոբերտ Քոչարյանը 2008թ. մարտի 1-ին հրամայեց բռնի ուժով ցրել ցուցարարներին։ Ոստիկանության, զինված ուժերի եւ ցուցարարների միջեւ տեղի ունեցած բախումների հետեւանքով զոհվեց 10 մարդ՝ 8 ցուցարար եւ ոստիկանության 2 աշխատակից։ ՀՀ նախագահի պաշտոնը թողնելուց հետո Ռոբերտ Քոչարյանը 2009-2021 թվականներին եղել է ռուսական «Սիստեմա» ԲՖԿ տնօրենների խորհրդի անդամ։ 2018-ի իշխանափոխությունից հետո Ռոբերտ Քոչարյանի նկատմամբ նախաձեռնվել է քրեական վարույթ Մարտի 1-ի եւ ապօրինի գույքի բռնագանձման գործերով, որոնք ընթացքի մեջ են։ 2021-ին նա վերադարձավ քաղաքականություն եւ մասնակցեց արտահերթ խորհրդարանական ընտրություններին՝ դառնալով գործող վարչապետ Նիկոլ Փաշինյանի հիմնական մրցակիցը։ Նրա ղեկավարած «Հայաստան» դաշինքն անցավ խորհրդարան՝ ձեւավորելով 28 պատգամավորից բաղկացած «Հայաստան» խմբակցությունը։ Նա հայտարարել է, որ մասնակցելու է 2026-ի խորհրդարանական ընտրություններին։ Ռոբերտ Քոչարյանը պրոռուսական կողմնորոշում ունի, կարծում է, որ Հայաստանը ներկայում ի վիճակի չէ տարածաշրջանում ինքնուրույն ապահովել իր անվտանգությունը, ուստի պետք է վերականգնել Ռուսաստանի հետ ռազմավարական գործընկերությունը։
  • Սեդրակ Քոչարյան
    Սեդրակ Քոչարյանը Սամվել Մայրապետյանի գործընկերն է։ ՀՀ երկրորդ նախագահ Ռոբերտ Քոչարյանի ավագ որդին է, մասնագիտությամբ տնտեսագետ է և զբաղվում է բիզնես գործունեությամբ սկսած 2002 թվականից, երբ նրա հայրը ՀՀ նախագահն էր։ Սեդրակ Քոչարյանը ներկայումս մի շարք ընկերություններում հիմնադիր, համահիմնադիր, տնօրենների խորհրդի անդամ և նախագահ է։ Նա և կինը՝ Զարուհի Բադալյանը, գույք ունեն Հայաստանում և արտերկրում, մասնավորապես՝ Տանզանիայում։ Սեդրակ Քոչարյանն անցնում է ապօրինի գույքի բռնագանձման գործով։ Ռոբերտ Քոչարյանի ավագ որդին և գործարար Սամվել Մայրապետյանը համատեղ բիզնես ունեն՝ «Տոյոտա Երևան» ՍՊԸ-ն, որը զբաղվում է «Տոյոտա» մակնիշի ավտոմեքենաների վաճառքով և սպասարկմամբ։
Ակտիվ թափանցիկություն
ընկերությունը/ալիքը պրոակտիվ և ամբողջական հայտնում է սեփականության մասին, տվյալները պարբերաբար թարմացվում են և հեշտությամբ ստուգելի են
Վերնագրեր
Մետատվյալներ

Սամվել Մայրապետյանի և նրա հետ փոխկապակցված անձանց մասին տվյալները հասանելի են բաց աղբյուրներում։

Նրանց ընկերությունների, դրանցում ներգրավվածության մասին տվյալները վերցվել են Իրավաբանական անձանց պետական ռեգիստրից։

 

Աղբյուրներ
Փաստաթղթեր (PDF)
  • Second Armenian TV Channel LLC profile (Armenian)
    Link File
  • Second Armenian TV Channel LLC Beneficial ownership declaration (Armenian)
    Link File
  • Second Armenian TV Channel LLC CEO (Armenian)
    Link File
  • Second Armenian TV Channel LLC owner (Armenian)
    Link File
  • Second Armenian TV Channel LLC charter (Armenian)
    Link File
  • Second Armenian TV Channel LLC charter updated (Armenian)
    Link File
  • MOM request to H2 (Armenian)
    File