Civic.am

«Քաղաքացիական պայմանագիր» կուսակցությունը հիմնադրվել է 2015 թվականին։ Կուսակցության վարչության նախագահը Հայաստանի Հանրապետության վարչապետ Նիկոլ Փաշինյանն է։ Իրական շահառուի հայտարարագրում ևս նշված է նրա անունը՝ որպես կուսակցության գործունեության ընդհանուր կամ ընթացիկ գործունեությունը իրականացնող պաշտոնատար անձ։

Նիկոլ Փաշինյանն առաջին անգամ վարչապետի պաշտոնում ընտրվեց 2018 թվականին՝ Հայաստանում տեղի ունեցած «թավշյա, ժողովրդական» հեղափոխությունից հետո: Նույն տարում նա հրաժարական տվեց խորհրդարանը ցրելու և նոր ընտություններ կազմակերպելու համար։ Այն տեղի ունեցավ 2018-ի դեկտեմբերին։ Խորհրդարանական ընտրություններից հետո Նիկոլ Փաշինյանը երկրորդ անգամ ընտրվեց վարչապետ։ 2020 թվականի արցախյան 44-օրյա պատերազմից հետո Հայաստանում ստեղծված քաղաքական ճգնաժամը հանգուցալուծելու նպատակով Փաշինյանը 2021-ի ապրիլի 25-ին հրաժարական տվեց, նույն տարվա հունիսի 20-ին արտահերթ ընտրություններ անցկացվեցին։ ՔՊ կուսակցությունը խորհրդարանում մեծամասնություն կազմեց, և Փաշինյանը երրորդ անգամ ընտրվեց վարչապետ։ Խորհրդարանական հաջորդ ընտրությունները տեղի կունենան 2026-ին։

Հիշատակման արժանի են ՔՊ կուսակցության ֆինանսավորման վերաբերյալ լրագրողական բացահայտումները։ 2024թ. «ՍիվիլՆեթը» եւ «Ինֆոքոմը» պարզել էին, որ 2022թ. կուսակցության նվիրատուների մեջ եղել են մարդիկ, որոնք տեղյակ չեն եղել իրենց անունից նվիրաբերված գումարների մասին: Բացի այդ, բազմաթիվ նվիրատուների ֆինանսական վիճակը թույլ չէր տալիս, որ նրանք այդ գումարները նվիրաբերեին։ Իսկ որոշ դեպքերում այդ գումարներն օրենքով թույլատրվածից մեծ էին։ Փաստացի, ըստ լրագրողական հետաքննությունների, կուսակցության որոշ համակիրներ կամ ՏԻՄ ընտրությունների թեկնածուներ գումարներ էին նվիրաբերել կուսակցությանը այլոց անունից։ 

Վարչապետ Նիկոլ Փաշինյանն ընդունել էր, որ տեղի ունեցածում խնդիր կա, բայց այն որակել էր քաղաքական, ոչ քրեական։ Միաժամանակ հանդիմանել էր լրագրողներին, թե ինչու մյուս կուսակցությունների հաշվետվությունները չեն ստուգում։ Ի դեպ, ՔՊ կուսակցության հաշվետվությունը Infocom.am-ը  ստացել էր դատարանի միջոցով։

Իրավապահներն այդ բացահայտումների առնչությամբ երկու քրեական վարույթ էին հարուցել կուսակցության օգտին խոշոր չափերով ապօրինի նվիրատվություն ներգրավելու, նվիրատվության առավելագույն չափը գերազանցելու, չթույլատրված աղբյուրներից նվիրատվություններ ներգրավելու հատկանիշներով։ Քրեական վարույթներից մեկը կարճվել է, մյուսի քննությունը շարունակվում է։

Աստղիկ Սափեյանը Civic.am-ի խմբագիրն է, սակայն հայտնի չէ, թե երբվանից։ Նա աշխատել է նաև 1in.am-ում, այս մասին նշված է նրա Facebook-յան էջում։ Ազգային անվտանգության ծառայության կայքում 2019 թվականի մարտին հրապարակված հաղորդագրություններից մեկում նշված է, որ նա «Ժամանակ» և 1in.am կայքերի գլխավոր խմբագիրն է եղել։ Այդ հաղորդագրությամբ ԱԱԾ-ն հերքում էր 1in.am կայքում հրապարակված տեղեկավությունը։

Աստղիկ Սափեյանն ազգակցական կապ ունի Հայաստանի Թալին համայնքի ղեկավար Տավրոս Սափեյանի հետ, որը «Քաղաքացիական պայմանագիր» կուսակցության անդամ է։Նրա մասին այլ տեղեկություններ համացանցում չկան։

Նիկոլ Փաշինյանը մասնագիտությամբ լրագրող է, սովորել է Երևանի պետական համալսարանի բանասիրության ֆակուլտետի ժուռնալիստիկայի բաժնում։ Սակայն ուսումը չի ավարտել՝ ավարտական կուրսում հեռացվել է համալսարանից, ինչպես նշված է իր կենսագրականում՝ «քաղաքական դրդապատճառներով»։

Նա 1992 թվականից ակտիվորեն համագործակցել է տարբեր թերթերի հետ, ապա 1998 թվականին հիմնադրել «Օրագիր» օրաթերթը, որը 1999 թվականին քաղաքական պատճառներով դատական կարգով փակվել է։ 1999 թվականին դարձել է «Հայկական ժամանակ» օրաթերթի գլխավոր խմբագիրը և այդ պաշտոնը զբաղեցրել մինչև 2012 թվականը։ 2006-2008թթ. եղել է «Դարեսկիզբ» ՍՊԸ-ի տնօրենը։ Լրագրողական գործունեության ընթացքում նրա նկատմամբ հարուցվել են մի շարք քրեական գործեր զրպարտության եւ վիրավորանքի մեղադրանքներով։ 1999 թվականի օգոստոսին դատապարտվել է մեկ տարվա պայմանական ազատազրկման։ Ավելի ուշ՝ միջազգային և Հայաստանի լրագրողական հանրության պահանջով վերաքննիչ դատարանը ազատազրկման ի կատար ածումը հետաձգել է մեկ տարով, ինչի արդյունքում ազատազրկումն ի կատար չի ածվել:

Քաղաքական ուղին Նիկոլ Փաշինյանը սկսել է որպես ընդդիմադիր գործիչ՝ 2006 թվականին մասնակցելով «Այլընտրանք» հասարակական-քաղաքական նախաձեռնության հիմնադրմանը։ 2007 թվականի խորհրդարանական ընտրություններում եղել է «Իմպիչմենթ» դաշինքի ցուցակի առաջին համարը, իսկ 2008 թվականի նախագահական ընտրություններում՝ Լևոն Տեր-Պետրոսյանի նախընտրական շտաբի անդամ։ 2008 թվականի մարտի 1-ի իրադարձություններից հետո, լինելով հետախուզման մեջ, մեկ տարի չորս ամիս անցկացրել է ընդհատակում։ 2009 թվականի հուլիսի 1-ին ինքնակամ ներկայացել է դատախազություն, ձերբակալվել և 2010 թվականի հունվարին դատապարտվել յոթ տարվա ազատազրկման՝ զանգվածային անկարգություններ կազմակերպելու մեղադրանքով։ Բանտում անցկացնելով մեկ տարի 11 ամիս՝ ազատ է արձակվել 2011 թվականի մայիսի 27-ին՝ համաներման որոշմամբ։ Բանտից ազատվելուց հետո, 2012 թվականի խորհրդարանական ընտրություններում ընտրվել է ԱԺ պատգամավոր «Հայ ազգային կոնգրես» դաշինքի համամասնական ցուցակով։ 2013 թվականին նա հիմնադրել է «Քաղաքացիական պայմանագիր» հանրային-քաղաքական միավորումը, որի հենքի վրա 2015-ին ձևավորվել է համանուն կուսակցությունը։ 2017 թվականի ապրիլի 2-ի ԱԺ ընտրություններում «ԵԼՔ» դաշինքի ընտրական ցուցակով կրկին ընտրվել է պատգամավոր, և 2017 թվականի մայիսից եղել է «ԵԼՔ» խորհրդարանական խմբակցության ղեկավարը։

2018 թվականին Նիկոլ Փաշինյանը սկսեց «Իմ քայլը» անվամբ շարժումը, որի արդյունքում վարչապետ Սերժ Սարգսյանը հրաժարական տվեց։ Նիկոլ Փաշինյանն ընտրվեց ՀՀ վարչապետ։ Այժմ Նիկոլ Փաշինյանի ղեկավարման երրորդ ժամկետն է, որը կլրանա 2026 թվականին։ Նրա ղեկավարած ՔՊ կուսակցությունը պատրաստվում է մասնակցել 2026 թվականի ընտրություններին։