«Արմենիա Թի-վի»

«Արմենիա Թի-վի»-ն փակ բաժնետիրական ընկերություն է։ Այն 1998-ին հիմնել են Բագրատ Արտեմի Սարգսյանը եղբոր՝ Վահագն Սարգսյանի, հոր՝ Արտեմ Սարգսյանի, Դավիթ Սարգսյանի և Սեդրակ Սեդրակյանի հետ։ Հիմնադրման պահին Բագրատ Սարգսյանն ունեցել է 27%, Վահագն Սարգսյանը՝ 9.88%, Արտեմ Սարգսյանը՝ 26.16%, Դավիթ Սարգսյանը՝ 21.51%, իսկ Սեդրակ Սեդրակյանը 15.41% բաժնեմաս:

2004-ին տեղի է ունեցել «Սի-Էս մեդիա սիթիի» կամ «Արմենիա» մեդիա հոլդինգի բացման արարողությունը, որի կազմում էին «Արմենիա», «Արմնյուզ», «TV-5» հեռուստաընկերությունները, «FM 10» ռադիոկայանը եւ մի շարք այլ ընկերություններ։ Ըստ լրատվամիջոցների հրապարակումների՝ Բագրատ Սարգսյանը  հանդիսացել է նաև «TV-5» հեռուստաընկերության (ներկայում չի գործում) իրական սեփականատերը։ Լրատվամիջոցները նաև գրում էին, որ Բագրատ Արտեմի Սարգսյանը վայելում է ՀՀ երկրորդ նախագահ Ռոբերտ Քոչարյանի հովանավորությունը։ Սակայն Քոչարյանի՝ նախագահի պաշտոնից հեռանալուց հետո նրա դիրքերը աստիճանաբար թուլացան։ Հետագայում Բագրատ և Վահագն Սարգսյանները տեղափոխվեցին ԱՄՆ։ ԱՄՆ-ում եղբայրները հիմնել են USArmenia հեռուստաընկերությունը: Սարգսյանների ընտանիքը նաեւ Armflix հարթակի համահիմնադիրն է։ Սա մեդիահավելված է, որտեղ բացառապես հայկական մեդիաարտադրանք է։ 

Հատկանշական է, որ «Արմենիա» հեռուստաընկերությանն ուղղված հարցման պատասխանում նշվում է, որ «Արմենիա» հեռուստաընկերության հիմնադիրը «Պանարմ» ՍՊԸ-ն է, որը հիմնադրվել է շատ ավելի ուշ՝ 2011-ին։ Իսկ «Պանարմ» ՍՊԸ-ի հիմնադիրները, ըստ իրավաբանական անձանց էլեկտրոնային ռեգիստրի, Բագրատ Արտաշեսի Սարգսյանը ու Ռոբերտ Հովհաննիսյանն են։ Հիմնադրման պահին նրանք այս ընկերությունում ունեցել են հավասար՝ 50-ական տոկոս բաժնեմաս։

2014-2019-ը «Պանարմ» ՍՊԸ-ի  հիմնադիրներից Բագրատ Արտաշեսի Սարգսյանին է պատկանել նաեւ «Ա-թիվի» հեռուստաալիքը։Մեզ չի հաջողվել նույնականացնել նրան։

Ռոբերտ Հովհաննիսյանը «Արմենիա» հեռուստաընկերության սեփականատերն է, միաժամանակ հեռուստաընկերության կրեատիվ զարգացման պատասխանատուն։ 2019-ից Ռոբերտ Հովհաննիսյանին է պատկանում «Ռադիո-ՊՌՈ» ՍՊԸ-ն, որը նույն «Ռադիո ջան» ռադիոկայանի ընկերությունն է։ 2019-ին «Պանարմենիան մեդիա գրուպի» տարածած հաղորդագրության մեջ նշվում է, որ «Արմենիա» հեռուստաընկերության և «Ռադիո ջանի» բաժնետոմսերի 100%-ը արդեն հանդիսանում է հայտնի մեդիագործիչ, ռուսական «Քոմեդի քլաբ պրոդաքշընի» հիմնադիր Արթուր Ջանիբեկյանի ընտանիքի սեփականությունը։ Ռոբերտ Հովհաննիսյանը Արթուր Ջանիբեկյանի կնոջ եղբայրն է։ Իրավաբանական անձանց պետական ռեգիստրի համաձայն՝ 2018-ից մինչ օրս հեռուստաընկերության բաժնետոմսերի 100%-ը պատկանում է Ռոբերտ Հովհաննիսյանին։

Դավիթ Բաբախանյանը «Արմենիա» հեռուստաընկերության տնօրենի պաշտոնը ստանձնել է 2012-ին։

Մասնագիտությամբ բժիշկ Բաբախանյանը 2003-ից համագործակցում է «Արմենիա» հեռուստաընկերության հետ։ Նա եղել է մի շարք հաղորդումների պրոդյուսեր, սցենարիստ, նախագծերի ռեժիսոր։

Տեղեկատվության հարցման պատասխանի համաձայն՝ Արթուր Ազարյանը 2023-ից մինչ օրս «Արմենիա» հեռուստաընկերության «Ժամը» լրատվականի գլխավոր խմբագիրն է։ Մինչ այդ՝ 2019-2023-ը եղել է Մտավոր սեփականության իրավունքների և օբյեկտների հետ գործարքների մշակման ազգային համակարգող կենտրոնի հանրային կապերի ղեկավարը։Ազարյանը 2017-2019-ը եղել է «Ճամփորդ» օրաթերթի, իսկ 2015-2016-ը՝ «Արարատ» հեռուստաընկերության (ներկայում չի գործում, ըստ մամուլի՝ այն Հանրապետական կուսակցության հետ էր փոխկապված) «Հայլուր» լրատվական ծառայության գլխավոր խմբագիրը։ 2014-2015-ը նա դարձյալ եղել է «Արմենիա Թիվիի» «Ժամը» լրատվական ծառայության խմբագիրը։ Արթուր Ազարյանը 2003-2014թթ.ընդմիջումներով եղել է «Կենտրոն» հեռուստաընկերության (ըստ մամուլի` «Կենտրոն» հեռուստաալիքի դե ֆակտո սեփականատերը «Բարգավաճ Հայաստան» կուսակցության ղեկավար Գագիկ Ծառուկյանն է) «Էպիկենտրոն» լրատվական ծառայության տնօրենը։ 2007-ից Ազարյանը եղել է «Երկիր մեդիա» հեռուստաընկերության ստեղծագործական գծով տնօրենը։ Իսկ 2002-2003թթ. եղել է «Կենտրոն» ՀԸ «Էպիկենտրոն» լրատվական ծառայության խմբագիրը։ Մինչ այդ Ազարյանը տարբեր թերթերում զբաղեցրել է խմբագրի, փոխխմբագրի պաշտոններ, այդ թվում՝ «Նազարեթ», «Շեմ», «Երևանյան օրեր» և այլն։

Լրատվամիջոցների և լրագրողական կազմակերպությունների հրապարակումների համաձայն՝ 2001-2010թթ. հեռուստաընկերությունում 50% բաժնեմաս է ունեցել նաև Ջերալդ Գաֆէսճեանը։ Ջերալդ Գաֆէսճեանը ամերիկահայ գործարար է, որը Հայաստանում մեծ ներդրումներ է արել, ինչպես, օրինակ՝ «Կասկադ» համալիրի վերականգնումը։ Նա նաև հիմնադրել է ԱՄՆ-Հայաստան հասարակական հարցերով ամերիկա-հայկական լոբբիստական կազմակերպությունը։

2010-ին արդեն լրատվամիջոցները գրում էին, թե Գաֆէսճեանի բաժնեմասն անցել է նախագահի աշխատակազմի ղեկավարի առաջին տեղակալ, նախագահի փեսա Միքայել Մինասյանին։

Ազգությամբ հայ հեռուստատեսային պրոդյուսեր, մեդիա մենեջեր Արթուր Ջանիբեկյանը ներկայում բնակվում է Ռուսաստանի Դաշնությունում։ Ջանիբեկյանը ՌԴ-ի հեռուստատեսային ոլորտի հայտնի դեմքերից է։ Նա եղել է ռուսական «Ուրախների և հնարամիտների ակումբի» (ռուսերեն կրճատ՝ КВН) 1994-ին ստեղծված «Նոր հայեր» հայկական թիմի անդամներից, որտեղից էլ մուտք է գործել հեռուստատեսության ոլորտ։ 2003-ին ընկերների հետ հիմնել է ռուսական «Քոմեդի Քլաբ» ակումբային շոուն, որը հեռարձակվում էր TNT հեռուստաալիքով։ 2007-ին արդեն հիմնադրվեց «Քոմեդի Քլաբ Փրոդաքշնը»: Եղել է մի շարք հայտնի ռուսական նախագծերի պրոդյուսեր, այդ թվում՝ «Ունիվեռ», «Ինտերները», «Սաշա Տանյա» և այլն։ 

Ջանիբեկյանը 2015-2018-ը եղել է Ռուսաստանի «Գազպրոմ-Մեդիա Հոլդինգ» ժամանցային հեռուստաալիքների ենթահոլդինգի ղեկավարը։ 

Ջանիբեկյանը նաև բաժնեմաս ունի Վատիկանում ՀՀ նախկին դեսպան Միքայել Մինասյանի հիմնած «Ջազզվե» ՍՊԸ-ում։

Միքայել Մինասյանը Հայաստանի երրորդ նախագահ Սերժ Սարգսյանի փեսան է: Մինասյանը մի շարք պաշտոններ է զբաղեցրել։ 2005-2013-ը եղել է Սան Մարինոյի Հանրապետության հյուպատոսը Հայաստանում։ 2007-2008-ը՝ վարչապետի օգնական, 2008-2012-ը զբաղեցրել է նախագահի աշխատակազմի ղեկավարի առաջին տեղակալի պաշտոնը։ 2013-2018-ը Վատիկանում Հայաստանի դեսպանն էր։ Համատեղության կարգով, 2017-2018-ը եղել է Պորտուգալիայի Հանրապետությունում ՀՀ դեսպանը։ 2018 թվականին Հայաստանում սկսված հակակառավարական ցույցերի հետևանքով Սերժ Սարգսյանը ապրիլի 23-ին հրաժարական տվեց Հայաստանի վարչապետի պաշտոնից։ Հետագայում Միքայել Մինասյանը ետ կանչվեց դեսպանի պաշտոնից, ապա լքեց Հայաստանը։ Նրա նկատմամբ քրեական գործ է հարուցվել փողերի լվացման մեղադրանքով։ Մինասյանն  արտերկրից սկսել էր տեսաուղերձներ հրապարակել, որոնցում քննադատում էր ներկայիս իշխանությունների գործունեությունը։ 

Մինչև 2019-ը «Արմենիա Թի-վի»-ն «Պանարմենիան Մեդիա Գրուպի» կազմում է եղել։ Այն ներառել է «Արմենիա Թի-վի», «Ա-Թիվի», «Արմնյուզ», «Պանարմենիան TV» (ԱՄՆ), հեռուստաընկերությունները, tert.am և blognews.am կայքերը, «Ռադիո Ջան» և «Լավ Ռադիո» ռադիոկայանները։ Մամուլի հրապարակումների համաձայն՝ «Պանարմենիան Մեդիա Գրուպի» իրական սեփականատերը Վատիկանում Հայաստանի նախկին դեսպան Միքայել Մինասյանն է եղել։

 2019-ին կազմակերպությունը դադարեցրեց գործունեությունը որպես մեդիա միավորում։ Այդ մասին տարածած հաղորդագրության մեջ ասվում էր. «Արմենիա» հեռուստաընկերության բաժնետոմսերի 100%-ն արդեն հանդիսանում է ռուսական «Քոմեդի քլաբ պրոդաքշընի» հիմնադիր Արթուր Ջանիբեկյանի ընտանիքի սեփականությունը»։ Ռոբերտ Հովհաննիսյանը Արթուր Ջանիկբեկյանի կնոջ եղբայրն է։ Իրավաբանական անձանց պետական ռեգիստրի համաձայն՝ 2018-ից հեռուստաընկերության բաժնետոմսերի 100%-ը պատկանում է Ռոբերտ Հովհաննիսյանին։