«Արմենիա Թի-վի» ՓԲԸ
«Արմենիա Թի-վի»-ին փակ բաժնետիրական ընկերություն է։ Այն 1998-ին հիմնել են Բագրատ Արտեմի Սարգսյանը եղբոր՝ Վահագն Սարգսյանի, հոր՝ Արտեմ Սարգսյանի, Դավիթ Սարգսյանի և Սեդրակ Սեդրակյանի հետ։ Հիմնադրման պահին Բագրատ Սարգսյանն ունեցել է 27%, Վահագն Սարգսյանը 9.88%, Արտեմ Սարգսյանը 26.16%, Դավիթ Սարգսյանը 21.51%, իսկ Սեդրակ Սեդրակյանը 15.41%:
Սակայն հեռուստաընկերությանն ուղղված հարցման պատասխանում նշվում է, որ ընկերության հիմնադիրը «Պանարմ» ՍՊԸ-ն է, որը հիմնադրվել է շատ ավելի ուշ՝ 2011-ին։ Իսկ «Պանարմ» ՍՊԸ-ի հիմնադիրները, ըստ իրավաբանական անձանց էլեկտրոնային ռեգիստրի, Բագրատ Արտաշեսի Սարգսյանն ու Ռոբերտ Հովհաննիսյանն են։ Հիմնադրման պահին նրանք այս ընկերությունում ունեցել են հավասար՝ 50-ական տոկոս բաժնեմաս։ 2017-ին, սակայն, Հովհաննիսյանը դուրս է եկել ընկերությունից։ 2017-ի մարտից ընկերության 99%-ի բաժնետեր է դարձել օֆշորում գրանցված «Բենեթ Գրուպ»-ը, իսկ Բագրատ Սարգսյանին պատկանել է ընդամենը 1%-ը։ «Բենեթ Գրուպի» վերաբերյալ լրատվամիջոցները գրել են, որ ընկերությունը փոխկապակցված է Վատիկանում ՀՀ նախկին դեսպան, Հայաստանի երրորդ նախագահ Սերժ Սարգսյանի փեսա Միքայել Մինասյանի հետ։
Հատկանշական է, որ «Հեռուստատեսության և ռադիոյի մասին» օրենքի 15-րդ հոդվածի համաձայն՝ մասնավոր հեռարձակողների դեպքում օտարերկրյա մասնակցության բաժինը չպետք է տվյալ կազմակերպության որոշումների ընդունման համար անհրաժեշտ բաժնեմասերի 50%-ին հավասար կամ ավելի լիներ, եթե այլ բան նախատեսված չէ միջազգային պայմանագրով։ Այսինքն՝ ստացվում է, որ «Արմենիա» հեռուստաընկերության հիմնադիր «Պանարմ» ՍՊԸ-ում 2017-ին օտարերկրյա բաժնեմաս է եղել՝ ի դեմս 99% բաժնեմաս ունեցող «Բենեթ Գրուպի»։ 2018-ից այս ընկերության միակ սեփականատերը Ռոբերտ Հովհաննիսյանն է։ «Արմենիա» հեռուստանկերությունից նաև հայտնում են, որ Ռոբերտ Հովհաննիսյանը ռուսական «Քոմեդի քլաբ պրոդաքշընի» հիմնադիր Արթուր Ջանիբեկյանի կնոջ եղբայրն է, իսկ հեռուստաընկերությունը ներկայում Ջանիբեկյան ընտանիքի սեփականությունն է։
Քանի որ «Արմենիա Թի-վին» ՓԲԸ է, դրա բաժնետերերի վերաբերյալ տեղեկություններ չկան պաշտոնական աղբյուրներում։ Լրատվամիջոցները հեռուստաընկերության սեփականատերերի շարքում տարբեր անուններ են նշել։
Այսպես, լրատվամիջոցների և մեդիա կազմակերպությունների հրապարակումների համաձայն՝ 2001-ին հեռուստաընկերության բաժնետեր է դարձել նաև ամերիկահայ գործարար Ջերալդ Գաֆէսճեանը։ «Արմենիա» հեռուստաընկերությունից հարցմանն ի պատասխան, հայտնել էին, որ Գաֆէսճեանի ունեցած բաժնեմասի վերաբերյալ տեղեկություների չեն տիրապետում, քանի որ Արթուր Ջանիբեկյանի ընտանիքի մասնակցությունը «Արմենիա Թի-վի» ՓԲԸ-ում եղել է շատ ավելի ուշ։ 2010-ին արդեն լրատվամիջոցները գրում էին, թե Գաֆէսճեանի բաժնեմասն անցել է Վատիկանում Հայաստանի նախկին դեսպան, ՀՀ երրորդ նախագահ Սերժ Սարգսյանի փեսա Միքայել Մինասյանին։ Մինչև 2019-ը «Արմենիա Թի-վին» «Պանարմենիան Մեդիա Գրուպի» կազմաւմ է եղել։ Մեդիա գրուպն իր մեջ ներառել է «Արմենիա Թի-վի», «Ա-Թիվի», «Արմնյուզ», «Պանարմենիան TV» (ԱՄՆ), հեռուստաընկերությունները, tert.am և blognews.am կայքերը, «Ռադիո Ջան» և «Լավ Ռադիո» ռադիոկայանները։ Մամուլի հրապարակումների համաձայն՝ «Պանարմենիան Մեդիա Գրուպի» իրական սեփականատերը Վատիկանում Հայաստանի նախկին դեսպան Միքայել Մինասյանն է եղել։
2019-ին կազմակերպությունը դադարեցրեց գործունեությունն որպես մեդիա միավորում։ Այդ մասին տարածած հաղորդագրության մեջ նշվում է, որ «Արմենիա» հեռուստաընկերության բաժնետոմսերի 100%-ն արդեն հանդիսանում է ռուսական «Քոմեդի քլաբ պրոդաքշընի» հիմնադիր Արթուր Ջանիբեկյանի ընտանիքի սեփականությունը։ Իրավաբանական անձանց պետական ռեգիստրի համաձայն՝ 2018-ից հեռուստաընկերության բաժնետոմսերի 100%-ը պատկանում է Ռոբերտ Հովհաննիսյանին։ Հովհաննիսյանի վերաբերյալ վերևում արդեն գրել ենք, որ նա Արթուր Ջանիբեկյանի կնոջ եղբայրն է։
Ի դեպ, «Պանարմ» ՍՊԸ-ն նշված է որպես «Արմենիա Թի-Վի» ՓԲԸ-ի միջանկյալ ընկերություն։ «Պանարմ» ՍՊԸ-ն հիմնադրվել է 2011-ին։ Նախկինում կոչվել է «Պանարմենիան մեդիա գրուպ», սակայն 2012-ի հունիսին վերանվանվել է «Պանարմ» ՍՊԸ։
Վերը նշված «Պանարմ» ՍՊԸ-ն իր հերթին «ՊԱՄԳ» ՓԲԸ-ի միջանկյալ ընկերությունն է։ «ՊԱՄԳ» ՓԲԸ-ն հիմնադրվել է 2001-ին։ Այս ընկերությունը 2002-2012թթ. կոչվել է «ՍիԷս» ՓԲԸ, և, ըստ լրատվամիջոցների հրապարակումների, պատկանել է Գաֆէսճեան ընտանիքին։ 2012-ից արդեն վերանվանվել է «Պանարմենիան մեդիա գրուպ» ՓԲԸ, կրճատ անվանումը՝ «ՊԱՄԳ» ՓԲԸ։ 2012-ից 2013-ը ընկերության տնօրենն է եղել Վազրիկ Սեկոյանը, որը փողերի լվացման մեղադրանքով Միքայել Մինասյանի հետ անցնում է նույն քրեական գործով։
Հիմնական փաստեր
| Բիզնեսի ձև | Առևտրային / շահույթ հետապնդող |
|---|---|
| Իրավական ձև | Փակ բաժնետիրական ընկերություն |
Սեփականություն
| Անհատ սեփականատեր | |
|---|
Լրատվամիջոցներ
Փաստեր
| Հիմնադրման տարեթիվ | 1998 «Արմենիա Թի-Վին»-ն հիմնադրվել է որպես փակ բաժնետիրական ընկերություն 1998 թվականին։ Ընկերությունն իր պատմության ընթացքում ունեցել է տարբեր սեփականատերեր։ |
|---|---|
| Հիմնադիր |
|
| Աշխատակիցներ | 104 |
| Կոնտակտային տվյալներ | Եղվարդի խճուղի 1 շենք 0054 Երևան Հայաստան info@armeniatv.am www.armeniatv.am |
| Հարկային / նույնականացման համար | ՓԲԸ 01529346 ՀՀ արդարադատության նախարարության իրավաբանական անձանց պետական ռեգիստր |
| Եկամուտ | 2 291 089 000 դրամ/5 844 614 ԱՄՆ դոլար |
|---|---|
| Շահույթ | 49 595 000 դրամ/ 126,517 ԱՄՆ դոլար |
| Գովազդ (ընդհանուր ֆինանսավորման %) | 1 476 276 000 դրամ/3 766 010ԱՄՆ դոլար |
| Այլ ազդեցիկ անձինք |
|
|---|